Донбассыг хэн авах талаар тохиролцож чадсангүй

Ерөнхийлөгч Трампын Мар-а-Лаго хувийн эдлэнд Трамп, Зеленьский нар Ням гаригт (2025.12.28) уулзлаа. Уулзалтын дараа хоёр талаас хийсэн мэдэгдлээр аль аль нь уулзалтын үр дүнд сэтгэл хангалуун байгаагаа илэрхийлсэн нь 4 жил үргэлжилж буй Орос-Украины дайн дуусах нь гэсэн мессежийг түгээлээ. “20 зүйл бүхий Энхийн төлөвлөөгөөний 90%-ийг тохиролцлоо” хэмээн Зеленьский хэлсэн бол “Украины дайны төгсгөлийг ихэд ойртууллаа” хэмээн Трамп хэлжээ.

Гурван цаг үргэлжилсэн уулзалтаар энхийн төлөвлөгөөний 90%-ийг тохирлоо гэж байгаа ч хамгийн гол асуудал болох газар нутгийн асуудлаар, тухайлбал, Донбассыг хэн эзэмших вэ гэдэг асуудал дээр тохиролцож чадсангүй.

 Путин Донбассыг авна гэсэн байр суурь дээрээ хэвээр, Зеленьский Донбассыг Орост өгөхгүй гэсэн үгээсээ буцаагүй хэвээр, харин Трамп тэр хоёрыг наймаалцахыг санал болгосон хэвээр байна. “Одоо л тохиролцохгүй бол илүү их газар нутгийг Орост алдах болно” гэсэн сануулгыг Трамп Зеленьскийд хэлсээр байгаа.

Зеленьскийгийн зүгээс газар нутгийн асуудлыг украинчуудаас санал авах замаар шийдэх боломжтой гэж үзэж байгаа. “Энхийн төлөвлөгөөний бүхий л асуудлаар санал асуулга явуулахад бид бэлэн байна. Ялангуяа газар нутгийн асуудлаар. Яагаад гэвэл энэ бол украинчуудын газар” хэмээн хэвлэлийн бага хурлын үеэр Зеленский хэлжээ.