Токио ашиглалтаас гарсан цэргийн техникээ стратегийн эргэлтэд оруулна

Метро Манила хотод айлчлал хийхээр ирсэн “Өөрийгөө хамгаалах Тэнгисийн цэргийн хүчин”-ий хамгаалалтын ажилтан Амагири хөлөг онгоцны хажууд селфи хийж байна. 2018 он 02 сар

Ашиглалтаас гарсан цэргийн техник, хэрэгслээ Филиппин, Индонез улсад шилжүүлэх асуудлыг Токио хэлэлцэж байгаа бөгөөд энэ нь зүгээр нэг хуучирсан техник хэрэгслээсээ ангижрах үйл явц биш юм. Бүр цаашилбал, энэ нь олон арван жилийн хугацаанд үргэлжлэх аюулгүй байдлын түншлэлийн үндэс суурийг тавьж буй хэрэг билээ. Зүүн Өмнөд Азийн түнш орнуудтай хийж буй уулзалт, хэлэлцүүлгүүд нь Токиогийн батлан хамгаалахын дипломат стратегид чимээгүй боловч маш чухал эргэлт гарч байгааг илтгэж байна. Япон улс Өөрийгөө хамгаалах тэнгисийн хүчний (MSDF) хуучирсан хөлөг онгоц, нисэх онгоцуудыг төмрийн хог руу хаяхын оронд тэдгээрийг урт хугацааны улс төр, эдийн засаг, аюулгүй байдлын үр өгөөж авчрах стратегийн хөрөнгө хэмээн үзэх нь улам бүр нэмэгдсээр байна.

The Japan Times (2026-06-10)

ТОХИРОМЖТОЙ ЦАГ ҮЕ БА ӨСӨН НЭМЭГДЭЖ БУЙ НӨӨЦ

Энэхүү алхмын цаг хугацааны тохироо нь туйлын чухал ач холбогдолтой. Япон улс түүхэндээ байгаагүй хэмжээний батлан хамгаалах салбарын зэвсэглэлийг нэмэгдүүлэх хөтөлбөрийг хэрэгжүүлж эхэлснээр хуучин ангиллын дайны хөлөг онгоц, нисэх онгоц, зэвсгийн систем болон бусад тоног төхөөрөмж нь шинэ үеийн системүүдээр шат дараатайгаар солигдож байна. Үүний үр дүнд өөрсдийн хамгаалалтын чадавхийг бэхжүүлэхийг эрмэлзэж буй түнш орнуудын хувьд үйл ажиллагааны хувьд ашиглах бүрэн боломжтой техникийн асар том нөөц бүрдэж байгаа юм.

Өнгөц харахад энэ логик нь маш энгийн бөгөөд ойлгомжтой мэт санагдаж болно. Зүүн Өмнөд Азийн олон орнууд Японы шинэ үеийн "Могами" (Mogami) ангиллын фрегат хөлөг онгоц зэрэг өндөр өртөгтэй, нарийн төвөгтэй шинэ техникийг худалдан авч дийлэхгүй. Харин маш бага зардлаар олдож буй хуучин техникийг шууд хүлээн авч, үйл ажиллагаандаа нэвтрүүлэх бүрэн боломжтой. Гэсэн хэдий ч эдгээр тоног төхөөрөмжийн шилжүүлгийг зөвхөн хямдралтай цэргийн тусламж хэлбэрээр харах нь Токиогийн баримталж буй бүс нутгийн аюулгүй байдлын илүү өргөн хүрээний стратегийн тооцооллыг дутуу үнэлсэн хэрэг болно.

Японы Олон улсын ордон (International House of Japan)-ы батлан хамгаалах стратегийн шинжээч Оги Хирохито хэлэхдээ "Бүгд Найрамдах Филиппин Улсын газар зүйн байршил нь БНХАУ-ыг Тайваньтай дайн дэгдээхээс урьдчилан сэргийлэх, тогтоон барихад маш чухал ач холбогдолтой" гээд Манилагийн тэнгисийн цэргийн хамгаалалтын чадавхийг нэмэгдүүлэхэд туслах нь эргээд Японы өөрийнх нь аюулгүй байдлыг бэхжүүлнэ гэдгийг онцолсон байна.

Энэ утгаараа Токио зөвхөн хөлөг онгоц, нисэх онгоц экспортлоод зогсохгүй байгаа юм. Тэд батлан хамгаалахын салбарын техникийн шилжүүлгийг урт хугацааны стратегийн бат бөх харилцаа болгон хувиргахад шаардлагатай институцийн бүтэц, архитектурыг цогцлоон бүтээж байна.

ДОТООДЫН ХЭРЭГЦЭЭ БА БОЛОВСОН ХҮЧНИЙ АСУУДАЛ

Японы тал өөрийн хуучин зэвсэг, техникээсээ салах сонирхолтой байгаа практик шалтгаан бас бий. Жишээлбэл, "Абукума" (Abukuma) болон "Асагири" (Asagiri) ангиллын байлдааны хөлөг онгоцууд нь Өөрийгөө хамгаалах тэнгисийн хүчний хувьд үнэ цэнэ нь улам бүр буурсаар байгаа юм. Тэдгээр нь ажиллуулахад хэтэрхий олон хүн хүч (хүн амын нөөц) шаарддаг, засвар үйлчилгээ хийхэд зардал өндөртэй бөгөөд ирээдүйн тэнгисийн цэргийн ажиллагааны шаардлагыг хангах зарим чухал технологи, чадавхиар дутмаг байдаг.

Хадсон институтийн (Hudson Institute) батлан хамгаалахын шинжээч Мурано Масаши хэлэхдээ "Хүний нөөцийн хурцадмал асуудалтай тулгараад байгаа Өөрийгөө хамгаалах тэнгисийн хүчний хувьд эдгээр хөлөг онгоц нь үндсэн хөрөнгө гэхээсээ илүү ачаалал, санхүүгийн дарамт болж хувирч байна" хэмээн тэмдэглэжээ.

Филиппиний Батлан ​​хамгаалахын сайд Жуниор Гилберт Теодоро, Японы Батлан ​​хамгаалахын сайд Шинжиро Коизүмитэй Манила дахь Малакананг Ерөнхийлөгчийн ордонд. 2026 он 05 сар

Үүний цаана аж үйлдвэр, эдийн засгийн маш том хүчин зүйлүүд оршиж байгааг мартаж болохгүй. Хамгийн гол төөрөгдөл бол Японы цэргийн экспортын стратеги нь хөлөг онгоц эсвэл нисэх онгоцыг биет байдлаар нь шилжүүлснээр дуусгавар болдог гэж үзэх явдал юм. Бодит байдал дээр тухайн техник, платформ нь ердөө л харилцааг эхлүүлэх нэвтрэх цэг (хаалга) төдий зүйл билээ. Японы үнэндээ экспортлож байгаа зүйл бол хуучин сөнөөгч хөлөг онгоц, эргүүлийн завь эсвэл илүүдэл нисэх онгоц биш, харин бүхэл бүтэн батлан хамгаалахын "экосистем" юм.

Техник хүлээн авч буй тал урт хугацааны туршид тухайн платформыг ашиглахын тулд Японы аж үйлдвэр болон үйл ажиллагааны практиктай салшгүй холбогдохоос өөр аргагүйд хүрдэг. Үүнд дотоодын боловсон хүчнийг бэлтгэх. Техникийн бэлэн байдлыг хангах тогтвортой ложистик байгуулах. Хуучин техникийг цаг үетэй нь нийцүүлэн сайжруулах. Хамгийн гол нь Япон улстай шууд харилцах боломжтой сүлжээ бий болно.

Энэхүү шинээр гарч ирж буй стратеги нь институцийн түвшинд ч мөн баталгаажиж байна. Японы засгийн газар батлан хамгаалахын экспортыг дэмжих, хүргэлтийн дараах засвар үйлчилгээ, сургалтыг хариуцах, батлан хамгаалахын аж үйлдвэрийн баазыг бэхжүүлэх зорилготой шинэ байгууллага байгуулах талаар хэлэлцэж байгаа тухай мэдээлэл бий.

Түүнчлэн Япон улс АНУ-ын Гадаад цэргийн борлуулалтын (FMS) системтэй ижил төстэй өөрийн гэсэн загварыг бий болгохоор судалж байна. Энэхүү системээр дамжуулан засгийн газар нь хувийн хэвшлийн аж үйлдвэрүүдийг төлөөлөн экспортын гол суваг болж ажиллах юм.

Ийм санаачилгууд нь экспортыг амжилттай болгоход зөвхөн техник хэрэгсэл шилжүүлэх нь хангалтгүй бөгөөд засгийн газрын тасралтгүй дэмжлэг, ашиглалтын хугацааны турших засвар үйлчилгээ, хамтарсан ажиллагаа шаардлагатай гэдгийг ухамсарлаж буйн илрэл юм. Хуучин техник хэрэгслийг шилжүүлэх нь түнш орнуудад яг энэ экосистемийг бий болгоход тусалдаг.

Мураногийн үзэж байгаагаар, хэрэв эдгээр шилжүүлгийг урт хугацаанд үр дүнтэй байлгахыг хүсвэл ийм төрлийн дэмжлэгийн дэд бүтэц туйлын чухал ажээ. Хөлөг онгоцыг удирдах багийнхныг сургах нь зөвхөн эхлэл бөгөөд техникийн бэлэн байдлыг хадгалахад ложистик болон нарийн мэргэжлийн инженерүүд хэрэгтэй. Дэмжлэг байхгүй бол шилжүүлсэн хөлөг онгоцуудын ашиглалтын чадвар богино хугацаанд муудах эрсдэлтэй.

Өөрийгөө хамгаалах хүчний гишүүн Токио дахь Батлан ​​​​хамгаалах яамны үүдэнд харуулд зогсож байна. 2026 он 04 сар.

БИЗНЕСИЙН АШИГ БА АЖ ҮЙЛДВЭРИЙН ХЯЗГААРЛАЛТ

Гэсэн хэдий ч зарим шинжээч үүнээс ирэх шууд арилжааны үр ашгийг хэтрүүлэн үнэлэхгүй байхыг анхааруулж байна. Японы усан онгоцны үйлдвэрүүд ажиллах хүчний хомсдолд орж, дотоодын захиалга их байгаа энэ үед сэлбэг хэрэгсэл болон засвар үйлчилгээний дэмжлэг үзүүлэх нь тийм ч амар ажил биш юм. Оги шинжээчийн хэлснээр, ийм зохицуулалтууд нь "бизнесийн үүднээс авч үзвэл батлан хамгаалахын компаниудад тийм ч ашигтай, сэтгэл татам биш байж магадгүй" юм.

Мурано мөн адил засвар үйлчилгээ, шинэчлэн тоноглох төслүүд болон техникийн дэмжлэгээс олох бизнесийн ашиг нь "даруухан" түвшинд байна байх гэж таамаглаж байна. Гэсэн хэдий ч Оги эдгээр шилжүүлэг нь хүлээн авагч орнуудтай аж үйлдвэрийн хэлхээ холбоог бэхжүүлж, "ирээдүйн батлан хамгаалахын гүйлгээ болон харилцан ажиллах чадварыг улам бүр идэвхжүүлж чадна" гэдгийг тэмдэглэв.

Өөрөөр хэлбэл, урт хугацааны бодит үнэ цэнэ нь засвар үйлчилгээнээс олох шууд орлогод биш, харийн орны армид Японы техник хэрэгсэл, үйл ажиллагааны арга барилыг гүн суулгаж өгөхөд оршиж байгаа бөгөөд энэ нь тэдний ирээдүйн худалдан авалтын сонголтод шууд нөлөөлөх болно.

Японы Өөрийгөө хамгаалах хүчний хуучин хөлөг онгоцуудыг ашиглаж буй Зүүн Өмнөд Азийн тэнгисийн цэргийн хүчин Японы засвар үйлчилгээний стандартыг дагаж мөрдөх магадлал өндөр бөгөөд яваандаа Японы удирдлага дор техникийн шинэчлэл хийхийг эрмэлзэх болно. Нисэх онгоцны хувьд ч мөн адил логик үйлчилнэ: Японы ашиглалтаас гарсан онгоцыг ажиллуулж буй улс тухайн техникийн стандартад дасах бөгөөд энэ нь ирээдүйд шинэ систем худалдаж авах байгалийн сэдэл үүсгэдэг.

Үүнээс гадна, энэхүү стратеги нь Токиод өөрийн аж үйлдвэрийн хурц хязгаарлалтыг тойрч гарах боломжийг олгож байна. Японы усан онгоцны үйлдвэрлэл болон батлан хамгаалахын салбар ажиллах хүчний хомсдол, хүчин чадлын асар их дарамттай тулгарч байгаа юм. Дотоодын үйлдвэрүүд Өөрийгөө хамгаалах хүчинд зориулсан шинэ хөлөг онгоцуудыг нийлүүлэхийн зэрэгцээ гадаадын шинэ захиалгын төлөө өрсөлдөж, хүчин чадлынхаа туйлж байна.

Тийм учраас Мурано эдгээр шилжүүлгийг урт хугацааны үр дүнд хүргэхийн тулд Япон улс Өөрийгөө хамгаалах хүчний бэлтгэл үүрэгтнүүд (тэтгэвэрт гарсан боловсон хүчин) болон хувийн хэвшлийн мэдлэг чадварыг засвар үйлчилгээ, шинэчлэлийн ажилд илүү өргөнөөр татан оролцуулах шаардлагатайг онцолсон байна.

Хуучин техникийг шинэчлэн засварлах ажлыг заавал бүгдийг нь Японд хийх албагүй юм. Оги шинжээчийн хэлснээр, дотоодын үйлдвэрүүд үйл явцын зарим хэсгийг хариуцаж болох ч бусад шинэчлэл, засвар үйлчилгээний ажлыг хүлээн авагч орнуудын өөрсдийнх нь үйлдвэрүүдэд гүйцэтгэх боломжтой. Ийм зохицуулалт нь Япон улсад өөрийн цэргийн зэвсэглэлийг нэмэгдүүлэх дотоодын хэрэгцээ болон гадаад түншүүдийн өсөн нэмэгдэж буй шаардлагыг тэнцвэржүүлэхэд тусална.

Энэхүү хөдөлмөрийн хуваарилалт нь илүү өргөн хүрээний хандлагыг илтгэж байна: хуучин хөлөг онгоц, нисэх онгоц эсвэл пуужингийн систем нь шинэ техник экспортлохтой адил хэмжээний дипломат болон стратегийн үр ашгийг авчирдаг атлаа аж үйлдвэрийн хувьд хамаагүй бага хүчин чармайлт шаарддаг. Үр дүнд нь Япон улс аль хэдийн хэт ачаалалтай ажиллаж байгаа үйлдвэрлэгчиддээ гадаадын үйлчлүүлэгчдэд зориулж шинэ флот барих нэмэлт үүрэг өгөхгүйгээр бүс нутгийн нөлөөгөө гүнзгийрүүлж чадна.

Японы батлан ​​​​хамгаалахын сайд Шинжиро Койзуми болон Индонезийн батлан ​​​​хамгаалахын сайд Сжафри Сжамсоеддин нар өнгөрсөн сард Жакарта хотод уулзав.

ХАРИЛЦАН АЖИЛЛАХ ЧАДВАР БА ИРЭЭДҮЙН ХАМТЫН АЖИЛЛАГАА

Стратегийн үнэ цэнэ нь эдийн засгаас хамаагүй хальж байгаа юм. Тоног төхөөрөмж шилжүүлэх нь хүлээн авагч орны армийг Японы үйл ажиллагааны журам, засвар үйлчилгээний стандарт, холбооны архитектурыг нэвтрүүлэхэд уриалж, шахдаг. Цаг хугацаа өнгөрөхөд энэ нь Японы Өөрийгөө хамгаалах хүчинтэй улам бүр зохицон харилцан ажиллах чадвартай бүс нутгийн түншүүдийн сүлжээг бий болгоход тусалдаг. Хятадын тэнгисийн цэргийн үйл ажиллагаанд санаа зовж буй өнөөгийн нөхцөлд Энэтхэг-Номхон далайн бүс нутаг дахь аюулгүй байдлын хамтын ажиллагаа болон энэхүү зохицон ажиллах чадвар нь туйлын чухал юм.

Жишээлбэл, Японы хуучин хөлөг онгоцуудыг ашиглаж буй Филиппиний тэнгисийн цэргийн хүчин Токиотой хамтарсан сургуулилалт хийх, мэдээлэл солилцох болон тэнгисийн цэргийн зохицуулалттай ажиллагаанд илүү хялбар оролцох боломжтой болно.

Энэхүү динамик нь маш чухал бөгөөд учир нь Оги тэмдэглэснээр шилжүүлгүүд нь "ирээдүйн батлан хамгаалахын гүйлгээ болон хамтын ажиллагааг идэвхжүүлдэг." Японы системүүд түнш орны флотод нэгэнт суурилагдсан бол өөр нийлүүлэгч рүү шилжих зардал, нарийн төвөгтэй байдал нь эрс нэмэгдэж, урт хугацааны батлан хамгаалах харилцааг улам бэхжүүлдэг байна. Ийм динамик Зүүн Өмнөд Азийн бусад түншүүдтэй ч үүсэж болно. Үүний үр дүнд албан ёсны цэргийн эвсэл байгуулах эсвэл гадаадад байнгын цэргийн бааз байршуулах шаардлагагүйгээр Японы аюулгүй байдлын нөлөө аажмаар өргөжих болно. Энэ бол нэг удаад нэг хуучин платформ ашиглан байгалийн жамаар бүрэлдэж буй хамтын ажиллагаа юм.

Японы харьцангуй давуу тал нь хамгийн хямд систем эсвэл хамгийн хурдан хүргэлтийн хугацааг санал болгоход оршдоггүй. Үүний оронд тэдний давуу тал нь олон арван жилийн үйл ажиллагааны нэр хүнд болон ашиглалтаас гарч буй өндөр чанартай тоног төхөөрөмжийн өсөн нэмэгдэж буй нөөцийг ухаалгаар ашиглахад оршиж байна.

Хуучин тоног төхөөрөмжийг батлан хамгаалахын илүү өргөн харилцаанд орох нэвтрэх цэг болгон ашигласнаар Токио нь өрсөлдөгчдийн хувьд түрж гаргахад бэрх аж үйлдвэр, үйл ажиллагааны түшиц газруудыг тогтоож чадна. Энэ өнцгөөс харвал, Японы хуучин цэргийн техник хэрэгслийн шилжүүлэг нь хүндрэлтэй байгаа усан онгоцны үйлдвэрүүдээ дэмжихэд чиглэсэн аж үйлдвэрийн бодлого огтоос биш юм. Харин энэ нь аж үйлдвэр, арилжааны үр ашгийг хоёрдогч үр нөлөө болгон гаргаж авдаг, "хамгийн түрүүнд аюулгүй байдал" гэсэн зарчмыг баримталсан ухаалаг стратеги билээ.

Ашиглалтаас гарсан хөлөг онгоц, нисэх онгоц эсвэл туслах систем бүр нь батлан хамгаалахын хэлхээ холбоог гүнзгийрүүлэх, ирээдүйн худалдан авагчдыг бэлтгэх, урт хугацааны аюулгүй байдлын түншлэлийг бэхжүүлэх үнэлж баршгүй боломж юм. Техник нь хуучин байж болох ч түүнийг тойрон бүтээгдэж буй стратегийн харилцаа, үйл ажиллагааны дадал болон батлан хамгаалахын экосистем нь шинэ бөгөөд урт настай байх болно.