АН-ын дотоод сонгуулийн хагарал даамжрах нь!

МАН-ын зодоон түрдээ намдаж, ямар ч байсан Н.Учрал, Д.Амарбаясгалан, Н.Номтойбаяр нар засагт хамтрах болсноор нөгөө талд Л.Оюун-Эрдэнэ тун төвөгтэй нөхцөлд орж байна. Л.Оюун-Эрдэнийн зүгээс Н.Учралын засагт Шадар сайдаар ажиллах саналыг нь хүлээн авсан Н.Номтойбаярт битүү хатуу үг дайж, далд утгаараа “Бодь групп”-тэй ч холбож амжив. Н.Номтойбаяр өөрийнх нь үгийг хүлээж аваагүйг онцолсноороо тэд нэг ёсондоо зам салсныг илтгэж буй юм. Ямар л тэнэг хүн живж яваа хүний мөчир болох вэ дээ.

Тэгвэл Г.Занданшатарын засагт хамтарсан ИЗНН-ынхан хэрүүл, хагарлаасаа болж шинэ засгаас жийгдсэн. Тус намын хэрүүл мөн л УДШ-ийн босго давсан.

Нөгөө талд Л.Оюун-Эрдэнийг огцорсны дараагаас сөрөг хүчний байран дээрээ эргэн ирсэн Ардчилсан нам дотоод сонгуулиас болоод бас л бөөн хэрүүл заргатай сууж байна. Товчхондоо, дотоод сонгуулиас үүдэлтэй дотоодын тэмцэл АН-д улам ширүүсэх шинжтэй. Дотоод сонгуулийг МАН-ын царцаа нараар дүүрсэн гэж АН-ын жирийн гишүүд нь гомдол шүүмжлэлээ намынхаа удирдлагад удаа дараа хүргүүлсэн ч хүлээж аваагүй байдаг. Энэхүү гомдол заргыг шийдэх ёстой хүн нь З.Нарантуяа. Гэвч охин нь БЗД-ээс ҮБХ-ны гишүүн болсон, өөрөө Завханаас ҮБХ-ндоо орсон болохоор аль болох цаг хожих тактик ашиглаж байгаа гэж намын гишүүд нь түүнийг буруутгаж байна.

Иймээс БЗД-ийн Ардчилсан намынхан дотоод сонгуулиа МАН-д луйвардуулсан гэж УДШ-д гомдол гаргасан. Уг гомдлыг УДШ нийт шүүгчдийнхээ бүрэн бүрэлдэхүүнээр хэлэлцэхээр болжээ.

Түүнчлэн УИХ-ын гишүүн Х.Болормааг СБД-ийн Ардчилсан намыг МАН-ын царцаа нарыг ашиглаж авсан гэсэн баримтуудыг СБД-ийн АН-ын түр хорооноос О.Цогтгэрэл даргадаа хүргүүлж, намын Их хурлаас өмнө арга хэмжээ авахыг хатуу шаардсан.

Тэгвэл СХД-ийн намын хорооноосоо “хөөгдсөн” АН-ынхан, Хан-Уулаас ҮБХ-доо орж чадаагүй хууччуул, Чингэлтэй дүүрэгт Ардын намын царцаа нарт ялагдсан сөрөг хүчний гишүүд, БГД-ийн намаа Говь-Алтайнханд алдагсад, Хөвсгөлийн дотоод сонгуулийг будилаантуулсан гэж намын түр генсекээ буруутгаж буй өмнөх ҮБХ-ны гишүүд бүгдээрээ нэгдэж, О.Цогтгэрэлд шахалт үзүүлэхээр болжээ.

Тэд мөн нийслэлийн АН-ыг О.Цогтгэрэл Женкод хэргээр өгч, 2028 онд ахин ялагдуулах замыг заслаа гэж буруутгаж байгаа гэнэ. Ийнхүү АН-ын дотоод сонгуулийн маргаан томорсоор, шинэ ҮБХ-доо орж чадаагүй хуучин ҮБХ-ны гишүүд тусдаа хуралдахаар гарын үсэг цуглуулаад эхэлсэн байна. АН-ын өмнөх ҮБХ-ноос 250 гаруй хүн шинэ ҮБХ-доо орж чадаагүй, тэд УДШ дээр хүчинтэй хэвээр байгаа гэж өөрсдийгөө үзэж байгаа гэнэ. Ийнхүү АН-ын ҮБХ ахин хоёр талд хуралдаж, маргаан нь УДШ дээр сунжирч магадгүй байна.

Дашрамд сонирхуулахад, дотоод сонгуулиар шинээр бүрэлдсэн АН-ын ҮБХ-ны хурал энэ сарын 9-нд болох юм.