Э.Бат-Үүл: Монгол байхыг аварсан Эрийн гурван наадам!

Хотын дарга асан Э.Бат-Үүл үндэсний баяр наадмын мэндчилгээндээ эрийн гурван наадмын онцлог, утга учрын талаар тайлбарлан бичсэнийг сонирхуулъя.

Тэрбээр “Оросын коммунистууд Монголын байхуйг устгах аймшигт төлөвлөгөө гаргасан юм.Одоо бодоход Их Хядлага, Их Шатаалт, Их Нийгэмчлэл гэсэн 3 бүрдэл хэсэгтэй төлөвлөгөө байжээ.

40 мянга гаруй гэмгүй монголчуудыг ардын дайсан болгон алж, бүх сүм хийдийг шатааж, түүхийн үнэт дурсгалуудыг нь Эрмитаж руу дээрэмдэн ачиж,иргэдийнх нь амжиргааны хэрэгсэл болсон малыг нь хүчээр нийгэмчилсэн.Хөөрхий, зургаан зуу гаруй мянгахан хүн амтай цөөхөн монголчууд, тэднийг зөвлөлт хүн болгох гэсэн хүчирхийлэлд ширвэгдэн алийгаа алдан “Хойд насандаа учиръя”гэцгээн ар араасаа хальж байв.

Ийн голомтоо самруулах аймшигт цаг үе дор тун суу билэгтэй нэгэн санаа гарсан нь Үндэсний баяр наадам нэрээр Эрийн гурван наадмаа хийх санал байв.Ерөнхий сайд агсан А.Амар энэ саналыг гаргасан байж магадгүй гэж би таадаг.Ямар ч байсан Монгол байхыг авч үлдсэн жинхэнэ “ хар хайрцаг”-ын гайхалтай бодлого байсаан!

Ардын тоглоом нь үндэсний соёлын амин сүнс, фундамент байдаг хэмээх, суут соёл судлаач Иохан Хёизингийн онол байдаг. Энэ онолыг Амар сайд мэддэг байсан гэж би бодохгүй байна. Гэхдээ л зөнгөөрөө ийм гэдгийг мэдэж байсан биз.

Ямар чиг байсан, оросын коммунистуудад 70 гаруй жил дарлуулан Монгол байхаа алдахдаа хүрсэн аймшигт цаг үе дор,Монгол байхыг аварч үлдсэн нь Эрийн гурван наадам, морин хуур, монгол дээл зэрэг бөлгөө!

Эрх чөлөө, хөх тэнгэртээ эрхлэн сагах монголчуудыг,Эрийн гурван наадмын хийморь мөнхөд адислан байхыг ерөөе!” гэжээ.