Э.Батшугарын матрын нулимс

Ардчилсан намын цахим бүртгэлийн үеэр иргэдийн хувийн мэдээлэл ил болсон нь иргэний аюулгүй байдал, Хүний хувийн мэдээлэл хамгаалах тухай хуулийг зөрчсөн үү гэх асуудал хөндөгдөөд байна.

ЦХИХХ-ны сайд Э.Батшугар “ХУР-аас мэдээлэл татаж авахдаа хууль ноцтойгоор зөрчсөн” гэх тайлбар өгсөн бол АН-аас технологийн компанитай холбоотой гэв. Гэтэл төрд байгаа иргэний хувийн мэдээлэл яагаад хувийн компанийн гар орж, хяналтгүй ашиглагдав гэдэг Э.Батшугар сайдад ч хамаатай асуудал. Тэр өнөөдөр матрын нулимс гаргах нь утгагүй юм.

Технологийн компаниуд төрд байгаа мэдээллийг дундын системээр дамжуулан авахдаа заавал “миний мэдээллийг авахыг зөвшөөрч байна” товч дарах нөхцөлөөр авдаг. Нэг бол систем хөгжүүлэх компаниуд нууцлалын гэрээ байгуулдаг. Харамсалтай нь, энэ бол мэдээлэл алдагдах эрсдэлтэй.

Эсвээс төрийн системийн хамгаалалт сул тохиолдол хакерууд мэдээллийг хулгайлж, технологийн компаниудад зарах тохиолдол олон улсад элбэг болсон гэдгийг хэн хүнгүй мэддэг.

Тэгэхээр Э.Батшугар сайд аа, “ХУР болон “E-Mongolia"-д байгаа иргэдийн мэдээллийн аюулгүй байдлыг баталгаажуулж чаддаг уу” гэдгийг танаас асуух шаардлагатай байна. Хэрвээ технологийн компаниуд ХУР-тай гэрээ хийсэн бол яагаад аюулгүй байдлын заалт, мэдээлэл алдагдсан тохиолдолд хүлээх хариуцлага тодорхой бус байна вэ. Технологийн компани чухам хэрхэн иргэний хувийн мэдээллийг цуглуулж, системд оруулсан бэ гэдгийг тодруулж өгнө үү.

Ер нь, Төрийн албаны технологийн албан хаагчдын мэдлэг чадвар 2024 онд улсын дунджаас 21 хувиар доогуур байсныг мэдэх үү. Хоёр жилийн хугацаанд энэ үзүүлэлт дээшилсэн үү. Та хуулийнхаа нэрийг андуурч, хариуцлагыг зөвхөн хувийн компани руу түлхэж байгаа нь иргэдийг төрийн мэдээлэл хамгаалах чадамжинд эргэлзэхэд хүргэж байна. Хувийн компани нууцлалын гэрээг зөрчиж байгаа нь төрийн хяналт сул байгаагийн илрэл гэлтэй. Монгол төрийн зорилт болсон “ цахим үндэстэн” болохын тулд бид төр мэдээллийг минь хамгаална гэдэгт итгэх ёстой. Гэвч нэг л итгэл төрөхгүй боллоо.