Х.Булгантуяагийн "даажигнал"!

УИХ-ын Ерөнхий нарийн бичгийн дарга асан Б.Баасандорж яллагдагчаар татсан тогтоолтойгоо танилцсан байна. Түүнтэй хамт яллагдагчаар татагдсан УИХ-ын дэд дарга асан Х.Булгантуяа нь ТЕГ-ын гаргасан тогтоолтой танилцаагүй байна.

Тэднийг Үндсэн хууль зөрчин, Төрийн эрхийг хууль бусаар авсан хэрэгт буруутган, УЕП-оос яллагдагчаар татсан агаад ТЕГ мөрдөн шалгаж байгаа юм.

2025 оны аравдугаар сарын 16-17-нд Г.Занданшатарын Засгийн газрыг огцруулах УИХ-ын чуулганы хуралдааныг УИХ-ын дэд дарга асан Х.Булгантуяа даргалсан байдаг. Харамсалтай нь, түүнийг Үндсэн хууль зөрчин, Төрийн байгуулалтын байнгын хорооны саналын томъёоллоор санал хураасан гэсэн Үндсэн хуулийн Цэцийн Их суудлын хуралдааны дүгнэлт аравдугаар сарын 22-нд гарсан бий.

Х.Булгантуяагийн эл  үйлдэл Үндсэн хууль зөрчиж буйг академич С.Нарангэрэл, гавьяат хуульч Н.Лүндэндорж нарын олон хуульч тухайн үед багагүй сануулсан ч, тэрбээр хүлээж аваагүй.

Засгийн газраас гаргасан гомдлыг Үндсэн хуулийн Цэцийн Их суудлын хуралдаанаар хэлэлцэх үед Х.Булгантуяа нарын УИХ-ын гишүүд ҮХЦ-ийн танхимд багагүй үймээн дэгдээсэн байдаг. Тэд ҮХЦ-ийн шаардлагыг хүлээж авалгүй хуралдааныг хаяж гарсан нь багагүй шүүмжлэл дагуулсан.

Үндсэн хуулийн Цэцээс Төрийн байгуулалтын байнгын хорооны дэмжээгүй саналыг “дэмжье” гэсэн саналын томъёоллоор санал хураасан УИХ-ын 95-р тогтоолыг Үндсэн хууль зөрчсөн гэж дүгнэсэн билээ. Мөн УИХ-ын чуулганы нэгдсэн хуралдааны  аравдугаар сарын 16 болон 17-ны хоёр өдрийн ирцийг нийлүүлэн, 51 хувийн ирцээр хуралдааныг эхлүүлэн, санал хураасан нь эцэг хууль зөрчсөн байна гэж үзсэн. Товчхондоо, ҮХЦ-ийн дүгнэлт Х.Булгантуяаг төрийн эргэлт хийснийг тогтоосон гэсэн үг.

Төрийн эргэлт хийх нь хүнд ялтай гэмт хэрэгт тооцогддог. Эрүүгийн хуулийн 19.2 дугаар зүйлд "Төрийн эрх барих дээд байгууллагын эрх мэдлийг хууль бусаар авах, хадгалах зорилгоор үгсэн тохирч хүчирхийллийн аргаар авахад бэлтгэсэн, зохион байгуулсан, оролцсон, санхүүгийн дэмжлэг үзүүлсэн; төрийн эрх барих дээд байгууллагын эрх мэдлийг хэрэгжүүлэх үйл ажиллагаанд хүч хэрэглэн саад учруулсан бол 12-20 жил хүртэл хугацаагаар хорих ял шийтгэнэ" гэж заасан байдаг.

Түүний үг-үйлдлээс харахад Монголын төрөөр тохуурхаж байна гэлтэй. Засгийн газар, УИХ, ҮХЦ гээд түүний улстөржилтийн бай нь хувь хүн биш төрийн институциуд болж буй нь харамсалтай.

Тэрбээр Засгийн газрыг хууль бусаар огцруулж байгаагаа ч сайн мэдэж байсан. Гадаадын топ сургуулиудыг төгссөн, хууль тогтоох байгууллагад хоёр ч удаа сонгогдсон Х.Булгантуяа Үндсэн хууль зөрчиж байгаагаа ч гадарлахтай өндөр боловсролтой эмэгтэй. Тиймдээ ч Г.Занданшатараас уучлалт гуйж хэлсэн үг нь "Уучлаарай, ийм муухай саналаар хуралдаан даргалчихлаа".

Жирийн иргэнийг хууль дуудсан цагт очихгүй бол ял нь хүндэрдэг. Атал С.Ганбаатар, Х.Булгантуяа, Э.Болормаа нарт хууль, шүүх үйлчилдэггүй бололтой. Төрийг үл хүндэтгэсэн тэдний даажигнал, тохуурхал хаа хүрч төгсөх бол!

Н.БАЯР