Ялгаа: Урт цагааны ногоон байгууламж ба Рио Тинтогийн цэцэрлэг

1.

Нийслэлийн төсвийн хөрөнгө оруулалтаар Урт цагааны ногоон байгууламжийг “Бодь групп” тохижуулсан билээ. Нэгэнтээ Нийслэлийн Засаг дарга бөгөөд Улаанбаатар хотын захирагч (асан) Х.Нямбаатар “Урт цагааны чөлөөлсөн талбай болон урд талын авто замын зорчих хэсгийг оруулаад цэцэрлэгт хүрээлэн байгуулахаар төлөвлөсөн. Түүнчлэн уг цэцэрлэгт хүрээлэнд Улаанбаатар хотын түүх, түүний талаар сэдэвчилсэн судалбар зургуудыг байрлуулна” гэх ярилцлагыг хоёр жилийн өмнө өгч байв.

Нийтдээ 1 га талбайг хамарсан уг бүтээн байгуулалтад нийтдээ ₮44 тэрбумыг зарцуулсан агаад үүнээс ₮4 тэрбумаар нь “сүүдрэвч” гэх дэлхийн хамгийн том “хувцас хатаагч” хийсэн нь гэх шүүмжлэлд өртөх болсон юм. Түүнчлэн өнгөрсөн долоо хоногийн хэсэг зуурын "дусагнасан" бороонд газар доогуурх авто гараж нь усанд автсан зураг ч сошиалаар цацагдсан билээ.

2.

"Рио Тинто" компани Хүүхдийн паркийн баруун хэсэг дэх 10.2 га газрыг цэцэрлэгт хүрээлэн болгож тохижуулсан. Тус цэцэрлэгт хүрээлэнд задгай ногоон театр, хүүхдийн тоглоомын талбай, бяцхан цөөрөм барихаас гадна иргэдийн тухлах сандал, сүүдрэвч зэрэг иж бүрэн тохижилт хийж, 40 мянга гаруй мод бут тарьжээ. Уг цэцэрлэгт хүрээлэнг байгуулахад нийтдээ ₮28 тэрбумыг зарцуулсан байна.

“Рио Тинто Монгол” компанийн Бизнес хөгжлийн захирал Э.Хонгорзул “Өмнөд хэсэгтээ бид зүлэг мод бут зэргийг хийж тайван нөхцөлийг бүрдүүлж өгсөн. Хойд хэсгийг нь идэвхтэй бүс буюу задгай ногоон цамхаг, хүүхдийн тоглоомын талбай, “skateboard”-ийн талбай болон тэжээвэр амьтдын талбайг бүрдүүлсэн. Бид бүтээн байгуулалтаа сэтгэл зүрхээ шингээж хийсэн. Яагаад гэвэл, энэ бүтээн байгуулалтаараа нийслэлчүүддээ ногоон цэцэрлэгт хүрээлэнгийн хүртээмж болоод олон улсын стандарт ямар байдгийг харуулахыг зорьсон” тухайгаа хэвлэлийнхэнд мэдээлж байсан билээ.

Ийнхүү төсвийн хөрөнгө оруулалт болон хувийн хөрөнгө оруулалтын хийсэн ажил, бүтээн байгуулалтын ялгааг Урт цагааны ногоон байгууламж болон "Рио Тинто"-гийн цэцэрлэгт хүрээлэнгээс харж болно.

Х.ХАНДМАА