Alibaba: АНУ-ын засгийн газрыг шүүхэд өглөө

Хятадын цахим худалдаа, технологийн томоохон төлөөлөл “Alibaba” групп АНУ-ын засгийн газрын эсрэг өндөр эрсдэлтэй хуулийн тэмцэл эхлүүлж, өөрийг нь Хятадын армитай холбоотой хэмээн үзэж Батлан хамгаалах яамны (Пентагон) хар жагсаалтад оруулсныг цуцлуулахаар шүүхэд гомдол гаргажээ.

BBC

АНУ-ын Батлан хамгаалах яамнаас “Alibaba” компанийг Хятадын технологийн зохицуулах байгууллагуудын шаардлагыг биелүүлдэг тул армийн нэг салбар гэж үзэж байна  гэж мэдэгдсэн юм. Калифорни мужийн холбооны шүүхэд гаргасан тус нэхэмжлэлдээ “Alibaba” компани энэхүү шийдвэрийг эрс няцааж, “уг дүгнэлт нь ямар ч баримт болон хууль зүйн үндэслэлгүй” гэж үзжээ.

Энэхүү маргаан нь Пентагоноос энэ сарын сүүлээс эхлэн хамтран ажиллахыг хориглох компаниудын хар жагсаалтаа саяхан өргөжүүлж, үүнд “Baidu”, “BYD”, “Nio” зэрэг технологийн аварга компаниудыг багтаасны дараа гарч байна. Батлан хамгаалах яам “Alibaba”-г Бээжингийн зохицуулалтын дүрэм журмыг дагадаг учраас “Хятадын батлан хамгаалахын аж үйлдвэрийн баазад цэрэг-иргэний нэгдлийг дэмжигч” хэмээн тодорхойлж, “1260H” гэх хар жагсаалтад оруулсан байна.

Харин “Alibaba”-гийн зүгээс энэхүү үндэслэлийг үгүйсгэж, өөрийн хараат бус Төлөөлөн удирдах зөвлөлийн гишүүдийн хэн нь ч цэргийн албатай ямар нэгэн холбоогүй болохыг онцолжээ. Түүнчлэн Хятадад үйл ажиллагаа явуулж буй үндэстэн дамнасан компани бүр, тэр дундаа Америкийн компаниуд ч тус улсын дотоодын дүрэм журмыг яг ижилхэн дагаж мөрдөх ёстойг дурдсан байна. Түүнчлэн, өөрсдийнх нь платформ зэвсэг техник эсвэл тагнуулын зориулалттай биш, харин жижиглэн худалдаа болон үүлэн тооцооллын үйлчилгээнд зориулагдсан гэдгийг тодотгов.

“Alibaba бол Хятадын цэргийн компани биш, цэрэг-иргэний нэгдлийн стратегийн ямар ч бүрэлдэхүүн хэсэг биш. Alibaba-г 1260H жагсаалтад оруулсан шийдвэр нь дур зоргоороо бөгөөд үндэслэлгүй үйлдэл бөгөөд бид жагсаалтаас хасуулахаар Дайны яамны (Батлан хамгаалах яам) эсрэг шүүхэд нэхэмжлэл гаргаж байна” гэж тус компани ВВС агентлагт өгсөн ярилцлагадаа дурджээ.

Хэдийгээр энэхүү хар жагсаалт нь санхүүгийн хөрөнгийг шууд царцаахгүй ч, ирэх 6 дугаар сарын 30-наас эхлэн үйл ажиллагаанд нь маш хүнд цохилт үзүүлэхээр байна. Ирэх долоо хоногоос эхлэн Пентагон хар жагсаалтад орсон ямар ч компанитай бизнес эрхлэхийг хуулиар хориглох юм.

Хамгийн гол нь, энэхүү хууль нь хар жагсаалтад орсон компаниудтай нэг лобби үйлчилгээ болон хуулийн фирм дундаа ашигладаг АНУ-ын гэрээт гүйцэтгэгч байгууллагуудад ч мөн адил хамаарна. “Alibaba”-гийн үзэж байгаагаар, энэхүү хязгаарлалт нь бодит байдал дээр бүслэлт үүсгэж, тэдний Америк дахь урт хугацааны зөвлөхүүдийг өөрсдийн ашигтай батлан хамгаалахын гэрээг хамгаалж үлдэхийн тулд “Alibaba”-тай харилцаагаа таслахаас өөр аргагүйд хүргэж байна. Энэхүү дүрэм нь тус компани өөрийгөө хамгаалах шаардлагатай яг энэ эгзэгтэй үед Вашингтон дахь улс төр, хууль эрх зүйн дуу хоолойг нь боомилж байгаа хэрэг юм.

Нэхэмжлэлд дурдсанаар “Alibaba” өмнө нь тус агентлагтай уулзаж, Хятадын армитай холбоотой гэх асуудлаар тодруулга хийх, тэр дундаа АНУ-ын эдийн засагт оруулсан хувь нэмрийнхээ талаарх нотлох баримтыг танилцуулах хүсэлт гаргаж байжээ. Гэвч тус агентлаг тэдний ирүүлсэн материалыг хүлээн авсны дараа ч ямар нэгэн санал гомдол гаргаагүй, нэмэлт мэдээлэл шаардаагүй мөртлөө “Alibaba-д урьдчилж мэдэгдэлгүйгээр, шударга сонсгол хийлгүйгээр шууд жагсаалтад оруулсан” гэж гомдолд дурдсан байна. АНУ-ын Батлан хамгаалах яам энэ асуудлаар тайлбар өгөхөөс татгалзаж, ВВС-д “Бид үргэлжилж буй шүүхийн үйл ажиллагааны талаар тайлбар өгөхгүй” гэжээ.