Дэд сайд нарыг оноос өмнө томилно

Л.Оюун-Эрдэнийн Хамтарсан Засгийн газар дэд сайдгүй ажиллаж байсан ч угтаа Засгийн газар бүрэн эрхт төлөөлөгч, тусгай үүргийн элчин сайд, бүтээмжийн, хяналтын менежер нэртэй гэх зэргээр шинээр албан тушаал цөөнгүй бий болгож, төрийн албан хаагчийн тоог багагүй нэмсэн.

Засгийн газрын бүрэн эрхт төлөөлөгчдийн нэг нь Ж.Батзандан агаад түүнд стратегийн ордуудын 34 хувийг Баялгийн санд авах асуудлыг хариуцуулсан юм. Харин Л.Гансүх, Н.Энхбаяр, З.Энхболд, М.Энхболд, Ж.Эрдэнэбат, Сү.Батболд, С.Баяр нарыг тусгай үүргийн элчин сайдаар томилсон. Тэгвэл МАН, АН, ХҮН намаас нийт 128 хүнийг хяналтын болон бүтээмжийн менежерээр томилсон. Тэдний цалин хамгийн багадаа 7 сая төгрөгийн цалин авч байгаа гэх шүүмжлэл гарч байсан.

Тэгвэл Г.Занданшатарын Засгийн газар бүтээмжийн болон хяналтын менежер гэх албан тушаалыг татан буулгахаар шийджээ. Оронд нь Засгийн газрын тухай хуульд өөрчлөлт оруулж, дэд сайд нарыг томилохоор яригдаж байна. Дэд сайд нарын томилгооны асуудыг шинэ оноос өмнө УИХ-аар оруулж шийдүүлэхээр болжээ.

Засгийн газрын тухай хуульд өмнө нь “Дэд сайд нь сайдад улс төрийн бодлогын асуудлаар зөвлөх, мэдээллээр хангах, сайдаас олгосон бүрэн эрхийн хүрээнд харьяа агентлаг, байгууллагатай харилцах, тэдгээрийн үйл ажиллагааг уялдуулан зохицуулах, хөтөлбөр, төсөл, арга хэмжээний хэрэгжилтийн шуурхай зохицуулалтыг хангуулах, сайдын даалгаснаар Улсын Их Хурал, Ерөнхийлөгч, Засгийн газар, аймаг, нийслэлийн Засаг даргатай харилцах, сайдын түр эзгүйд түүний даалгаснаар сайдыг төлөөлөх” үндсэн үүрэгтэй гэж заасан байсан.

Хамтарсан Засгийн газрын үед дэд сайд нарыг гурван намаас нэг, нэг хүн тавина. УИХ-ын гишүүдийг дэд сайдаар томилох ч асуудал хөндөгдөж байсан билээ.

Тэгвэл Г.Занданшатарын Засгийн газар сандал, суудлын томилгоогоо оноос өмнө дуусгаж, ирэх жилээс бүтээн байгуулалтын ажилдаа шуурхайлахаар төлөвлөж байгаа гэх албан бус мэдээлэл МАН-ын цагаан байрнаас сонсогдож байна.

Дэд сайд нарыг томилох сургаар МАН-ын цагаан байр хөл хөдөлгөөнд орж, CV-гээ цүнхэлсэн горилогчид дарга нарынхаа өрөө хавиар багагүй эргэлдэх болсон байна.

Дэд сайд бол сайнаар хэлбэл, дараагийн сайдаа бэлтгэх дамжаа, муугаар хэлбэл шагналын алба гэж шүүмжлэх нь цөөнгүй.

Х.ДАГИНАС