Энхийн хэлэлцээрийн эерэг хүлээлт газрын тосны үнийг бууруулав

Al Jazeera

АНУ, Израиль болон Ираны хоорондох дайн дуусгавар болно гэсэн хүлээлт үүссэнтэй холбоотойгоор Японы хөрөнгийн зах зээл түүхэн дээд цэгтээ хүрч өслөө. Харин газрын тосны үнэ энэхүү мөргөлдөөнийг эцэслэх хэлэлцээрийн урьдчилсан итгэл найдварын нөлөөгөөр огцом унасан байна.

Дэлхийн газрын тосны үнийн гол жишиг болох Брент (Brent) маркийн түүхий тосны үнэ өнгөрсөн Ням гарагт 5 гаруй хувиар буурав. Энэ нь АНУ-ын ерөнхийлөгч Дональд Трамп тус мөргөлдөөнийг бүрмөсөн зогсоох хэтийн төлөвийн талаар эргэлзээтэй ч хоёрдмол утгатай дохио өгсөнтэй холбоотой юм.

Гринвичийн цагаар (GMT) 04.00 цагийн байдлаар Брент маркийн үнэ нэг торх нь $97.94-т хүрсэн нь нэг сарын өмнөхөөс даруй 9%-иар буурсан үзүүлэлт боловч дайн эхлэхийн өмнөх үетэй харьцуулахад гуравны нэг гаруй хувиар өндөр хэвээр байна. Үүний зэрэгцээ Японы хөрөнгийн биржийн гол индекс болох Nikkei 225 өглөөний арилжаагаар 3 гаруй хувиар өсөж, өнгөрсөн Баасан гаригийн дээд амжилтаа шинэчлэн, бүх цаг үеийн хамгийн өндөр цэгтээ хүрч хаагджээ.

Трамп Ням гарагт олон нийтийн сүлжээндээ Тегерантай хийж буй хэлэлцээ "эмх цэгцтэй, үр бүтээлтэй" үргэлжилж байгааг дурдаад, гэхдээ албаны хүмүүст "хэлэлцээрийг яаравчлахгүй байх" үүрэг өгсөн гэжээ. Тэрээр өөрийн “Truth Social” платформдоо "Хоёр тал цаг хугацаа гаргаж, бүх зүйлийг зөв голдиролд оруулах ёстой. Ямар ч алдаа байж болохгүй!" хэмээн бичсэн байна.

Трамп үүнээс өмнө буюу Бямба гарагт Ормузын хоолойг эргэн нээх нөхцөлийг багтаасан гэрээний төслийг "ерөнхийд нь тохиролцсон" хэмээн зарлаж, ахиц дэвшил гарна гэсэн итгэл найдварыг зах зээлд төрүүлээд байсан юм.

Сингапур дахь “Sparta” компанийн газрын тосны зах зээлийн ахлах шинжээч Жюн Го “Аль Жазира” (Al Jazeera) агентлагт өгсөн ярилцлагадаа "Ормузын хоолой хаалттай өдөр бүр 10-11 сая торх түүхий тосны нийлүүлэлт тасалдаж буй нөхцөл байдал өөрчлөгдөөгүй байна. Гэвч зах зээлд хэлэлцээр батлагдмагц гацсан усан онгоцуудаас 100 сая торх түүхий тос шууд урсан орж ирнэ гэсэн хүлээлт үүсчихээд байна" хэмээн тайлбарлав.

Жюн Гогийн үзэж байгаагаар, хэлэлцээр эцэслэгдсэний дараа ч зах зээл тодорхой хугацаанд тогтворгүй, түгшүүртэй байх магадлалтай аж. “Sparta”-гийн тооцооллоор олборлолт болон газрын тос боловсруулах үйлдвэрүүдийг хэвийн горимд нь буцааж оруулахад 3-аас 6 сарын хугацаа шаардагдах болно.

Иран улс өнгөрсөн 2-р сарын сүүлчээр дайн эхэлснээс хойш тус хоолойг албан ёсоор бүслээд байгаа бөгөөд энэ нь дэлхийн газрын тосны худалдааны бараг тавны нэг орчим хувийг саатуулж байгаа юм. Улмаар АНУ 4-р сарын дундаас эхлэн Ираны боомтуудад өөрийн зүгээс хориг тавьж, усан замын арилжааны тээвэрлэлтийг улам бүр хүндрүүлсэн билээ.

Ерөнхийлөгч Трамп Ням гаригийн цахим мэдэгдэлдээ АНУ-ын тавьсан хориг арга хэмжээ нь "хэлэлцээрт хүрч, баталгаажуулж, гарын үсэг зурах хүртэл бүрэн хүчин төгөлдөр үргэлжлэх болно" гэдгийг хатуу анхааруулсан байна.