Goldman Sachs: $500 саяыг тараана

Уолл Стритийн санхүүгийн аварга Goldman Sachs-ийн удирдлагууд энэ онд $500 сая хүртэлх урамшууллыг хуваан хүртэхээр дугаарлаж байна. Энэ нь тус банкийн түүхэнд бичигдэх хамгийн өндөр урамшууллын нэг болж байна.

Хамгийн том бялууг банкны гүйцэтгэх захирал Дэвид Соломон хүртэнэ. Тэрбээр Goldman Sachs-ийн хувьцаа хэлбэрээр $100 орчим саяын урамшуулал авч байгаа бөгөөд энэ нь өнгөрсөн онд авсан $47 саяын урамшууллаас даруй хоёр дахин өндөр дүн юм. Асар их мөнгөн дүнгээс бүрдэх энэхүү урамшууллын санг нийт 20 гаруй топ банкир хуваан авахаар зэхжээ.

$500 саяын урамшууллын сан нь 2021 онд тус банкны анх боловсруулсан урт хугацааны хөрөнгө оруулалтын төлөвлөгөөний эцсийн үр дүн юм. Энэ сарын сүүлээр баталгаажих уг урамшуулал нь сүүлийн таван жилийн хугацаанд Goldman-ий хувьцааны ханшийн өсөлтийн үр дүн. Нөгөө талаар, өнгөрсөн хугацаанд JP Morgan, Bank of America зэрэг өрсөлдөгчдөө ард үлдээсний шагнал аж.

Goldman Sachs-ийн зүгээс уг урамшуулал нь улам бүр ширүүн өрсөлдөөнтэй болж санхүүгийн салбарт CEO нараа банкдаа үргэлжлүүлэн ажиллах сонирхлыг төрүүлэх зорилготой гэж мэдэгджээ. Банкны ерөнхийлөгч бөгөөд Соломоныг залгамжлан гүйцэтгэх захирлаар томилогдох хамгийн өндөр магадлалтай байгаа Жон Уолдрон, мөн Глобал банк ба зах зээлийн газар хариуцсан захирал Ашок Варадхан, Дэн Диз зэрэг бусад удирдах багийнхан энэхүү урамшууллыг авах аж.

Анх Bloomberg агентлаг энэхүү өндөр дүнтэй шагналын сангийн тухай  Goldman Sachs гуравдугаар улирлын санхүүгийн тайлангаа танилцуулахаас хэдхэн хоногийн өмнө мэдээлж байлаа.

Урамшуулал нь Goldman Sachs-ийн хувьцааны үнэ цэнийг харуулж байгаа бөгөөд тус банкийн хувьцаа сүүлийн таван жилийн хугацаанд оргилдоо буюу 146% орчим өссөн ба Соломон гүйцэтгэх захирлаар томилогдсоноос хойш бараг 300% өссөн байна.

Банкын ТУЗ  эдгээр урамшууллыг гурван үндсэн зорилгод хүрэхийн тулд бий болгосон. Үүнд, нөхөн олговрыг гүйцэтгэлийн хатуу шалгууртай нийцүүлэх, удирдах бүрэлдэхүүнд ажлын урам өгөх, өрсөлдөөн ихтэй зах зээлд шилдэг боловсон хүчнээ авч үлдээх явдал юм.  Энэ урамшууллыг зарласнаар манай компани асар өндөр амжилттай ажиллаж байгаа нь нууц биш билээ” гэж банкны нэгэн хөрөнгө оруулагч ярьжээ.