О.Цогтгэрэл дарга аа, хуулийн төслөө уншчихаад улс төр хийнэ үү?!

УИХ дахь АН-ын бүлгээс мэдээлэл хийв. Бүлгийн хурлаар Ерөнхийлөгчийн санаачилсан УИХ-ын гишүүнийг эргүүлэн татахтай холбоотой хуулийн төслийг хэлэлцэх эсэхэд АН-ын бүлгийн гишүүд байр сууриа нэгтгэсэн гэж бүлгийн дарга О.Цогтгэрэл хэлэв.

АН-ын бүлэг 42 гишүүнтэй. Харин бүлгийн хуралд 25 гишүүн оролцож байр сууриа нэгтгэж, 2 одтой шийдвэр гаргасан гэв.

Харамсалтай нь, УИХ дахь АН-ын бүлгийн дарга, АН-ын дарга О.Цогтгэрэл хуулийн төслийг огт уншаагүй, өөрийнхөө тайлбарлаад байгаа үзэл баримтлалаа ч сайн ойлгоогүй гэдэг нь хоёрхон өгүүлбэрээс нь тодорхой харагдав.

Тэрбээр хуулийн үзэл баримтлалыг дэмжих боломжгүй гэх шалтгааныг,

1. УИХ-ын гишүүнд иргэдтэй адилхан хуулийн хариуцлага үйлчлээд явах ёстой. Одоогийн хуулинд ч гэсэн УИХ-ын гишүүнийг эргүүлэн татах харилцаа байдаг. Гэтэл одоо өргөн барьж байгаа хуулийн үзэл санаанд шүүхээс шийдвэр гараад УИХ-д хүргэгдсэнээр, Цэцээс шийдвэр гараад УИХ-д танилцуулснаар тухайн УИХ-ын гишүүнийг эргүүлэн татсанд тооцно гэж УИХ-ыг дархлаагүй болгох үзэл санаа явж байна

2. “УИХ-аас байгуулагдсан өөр бүтцээс шийдвэр гаргаад УИХ-д танилцуулахгүйгээр, УИХ-ын саналыг асуухгүйгээр, УИХ-тай өөртэй нь зөвшилцөлгүйгээр шууд УИХ-ын гишүүнээс эргүүлэн татлаа. Магадгүй нэг гишүүнийг, 10 гишүүнийг эргүүлэн татчихлаа. Хуулийн гэгдэх байгууллагаас шийдвэр гаргаад энэ шийдвэрийг УИХ хүлээн зөвшөөрөөгүй байхад хүчин төгөлдөр болно гэхээр үзэл баримтлалын хувьд хүлээн зөвшөөрөх боломжгүй ” гэж тайлбарлав.

Тайлж уншвал, УИХ-ын гишүүнийг ёс зүйн болоод бусад алдаа гаргасан гэж үзвэл шууд татах нь гэж О.Цогтгэрэл дарга ойлгожээ.

Гэтэл өнгөрсөн долоо хоногт хууль санаачлагчдын зүгээс хуулийн үзэл баримтлалыг УИХ-ын Байнгын хороод болон чуулган дээр хангалттай тайлбарласан. Үндсэн хуулийн цэц, намын дарга хэн ч байсан УИХ-ын гишүүнийг “ эргүүлэн татах” эрхгүй. Үндсэн хуулиар ч ийм эрх олгоогүй. Тиймээс УИХ-д оруулна, нээлттэй хэлэлцэнэ, 126 гишүүн бүрэн эрхийнхээ хүрээнд олонхийн саналаар шийдвэр гаргана гэж тайлбарлаж байв. Үүнийг хэвлэлийнхэн ч буулгасан. Хэрвээ уншдаг, хардаг бол хаанаас хуулийн үзэл баримтлалыг олж харж, асууж нягтлах эрх нь түүнд бий. Харин хуулийн төслийг унших нь түүний үүрэг.

Сөрөг хүчний нам, бүлгийг толгойлж байгаа хүн хуулийн төслөө уншихгүйгээр улс төр хийвэл өөртөө л хасах оноо авчирна.