Оросын ойлгох цорын ганц хэл шинжлэл бол ШАХАЛТ!

2026 оны 2-р сарын 12-нд Оросын дроны цохилтод өртсөн Украины Одесса хотын гудамжны зах дээр цэвэрлэгээ хийж байна. (Nina Liashonok/Reuters)

Орос улс Украины энгийн иргэдийн эсрэг агаараас үхэл таригч цохилтуудаа үргэлжлүүлж байгаа бол Украины Ерөнхийлөгч Зеленский фронтын шугамд шинэ тактик хэрэглэхээ амлаж байна.

Жон Т.Псаропулос (John T.Psaropoulos/aljazeera). 2026-02-13

Францын Батлан хамгаалахын сайд Катрин Вотрин Киевт айлчлах өдөр Орос улс Украины хотууд руу агаараас асар хүчтэй довтолгоо хийлээ. Хоёрдугаар сарын 7-нд болсон энэхүү халдлага нь хэдхэн хоногийн өмнө буюу хоёрдугаар сарын 3-нд НАТО-гийн Ерөнхий нарийн бичгийн дарга Марк Рюттег айлчлах үеэр Москвагаас үйлдсэн хүчтэй дайралтын давталт байв.

Гэгээн Эндрюсийн их сургуулийн түүхийн профессор Филлипс О’Брайен хэлэхдээ “эдгээр халдлагууд нь Украиныг барууны орнуудтай батлан хамгаалах харилцаагаа бэхжүүлсний төлөө шийтгэхээс гадна "шаталсан" шинж чанартай байсан” гэв.

Тэрээр өөрийн нийтлэлдээ “Эхний дайралт нь зүүн зүгт, ялангуяа Киев болон фронтын ойролцоох хотуудад төвлөрсөн. Үүнээс хэд хоногийн дараа Украины агаарын довтолгооноос хамгаалах хүчийг сульдуулж, туйлдуулсныхаа дараа Оросын довтолгоонууд баруун зүг рүү шилжсэн” гэж бичжээ.

ДАЙНЫ ХОХИРОЛ БА ИРГЭДИЙН НӨХЦӨЛ БАЙДАЛ

Ням гарагт болсон дайралтад 408 дрон, 39 пуужин ашигласан байна. Киев 26 дрон, 24 пуужингаас бусдыг нь амжилттай устгаж чадсан ч үлдсэн хэсэг нь эрчим хүчний дэд бүтцэд, тэр дундаа Ерөнхийлөгч Зеленскийн хэлснээр тус улсын атомын цахилгаан станцуудын "чухал байгууламжуудад" аймшигтай хохирол учруулжээ.

Үүний улмаас нэг станц зогсоход хүрч, бусад станцууд хүчин чадлаа бууруулсан байна. Нэгдүгээр сарын дунд үеэс хойш Орос улс Украиныг харанхуйд автуулахын тулд хавсарсан цохилтуудыг тасралтгүй хийж байгаа юм. Энгийн иргэд -20 градусын хүйтнийг тэсвэрлэн туулж байгаа бөгөөд засварын багийнхан Оросуудын сүйтгэсэн эрчим хүч, дулааныг дахин сэргээхээр амрах чөлөөгүй ажиллаж байна.

40 настай Юлия Давыденко нийтийн халуун усны газарт хоёр настай охин Стефанигаа алчууранд ороож тэвэрсэн байна. Оросын дайралтын улмаас тэдний орон сууц халаалт, халуун усгүй болсон. Украин. Киев. 2026 оны 2-р сарын 3. (Alina Smutko/Reuters)

ЗАРИМ ЦОХИЛТУУД ХҮНИЙ АМЬ НАСЫГ АВЧ ОДСООР БАЙНА

Лхагва гарагт Украины зүүн хэсгийн Богодухов хотод Оросын дрон нэгэн байшинг нураах үеэр хоёр жаал хүү, нярай охин эцгийн хамт амиа алджээ. Жирэмсэн эх нь ганцаараа амьд үлдсэн бөгөөд дэлбэрэлтийн улмаас байшин хохирогчдын дээрээс нурж, гал гарсан байна.

Үүнээс өмнөх өдөр Украины хяналтад байдаг Донецк мужид Оросын агаарын цохилтын улмаас 14 настай охин, ээжийнхээ хамт амиа алджээ.

Пүрэв гарагт Одесса хотод Оросын цохилтын улмаас 300,000 орчим хүн цахилгаан, усгүй болж, 200 орчим барилга дулаангүй болсон байна.

Зеленский батлан хамгаалах тактиктаа өөрчлөлт оруулахаа амласан боловч энэ нь нууц хэвээр байна. Тэрээр мягмар гарагийн орой хэлсэн үгэндээ: “Зарим бүс нутагт багуудын ажиллах хэлбэрийг бүрэн шинэчилж байна... Энэ нь фронтын хангамжид тавих хяналтад ч хамаатай” гэжээ.

УКРАИН ХАРИУ ЦОХИЛТ ӨГЧ БАЙНА

Украин улс Оросын пуужин, дронуудаа хөөргөдөг нисэх буудлуудыг онилохыг хичээж байна. 2-р сарын 5-нд Украины Ерөнхий штаб Астрахань дахь Капустин Яр туршилтын талбайд байгаа баллистик пуужингийн "хөөргөхөөс өмнөх бэлтгэл" хийдэг байгууламжууд руу Украинд үйлдвэрлэсэн “FP-5 Flamingo” далавчит пуужингаар гал нээсэн гэж мэдэгдэв. Энэ нь Оросын хилийн гүнд 400 км гаруй зайд орших цэг юм.

Мөн 2-р сарын 8-ны ням гарагт Украин улс Тверь мужийн Редкино судалгааны үйлдвэр рүү довтолсон бөгөөд уг үйлдвэрийг түлшний нэмэлт болон тэсрэх бодис зэрэг давхар зориулалттай бүтээгдэхүүн үйлдвэрлэгч гэж тодорхойлсон байна.

ХҮН ХҮЧНИЙ ХОХИРОЛ БА STARLINK-ИЙН АСУУДАЛ

Холын зайн цохилтууд хэвлэл мэдээллийн анхаарлыг татаж байгаа ч хуурай замын дайнд Орос улс асар их хохирол амсаж байгааг Украины Зэвсэгт хүчний ерөнхий командлагч Александр Сырский онцоллоо. Түүний хэлснээр, 1-р сард Оросын талаас амь үрэгдсэн болон хүнд шархадсан хүний тоо 31,700-д хүрсэн нь тухайн сард элсүүлсэн цэргүүдийн тооноос 9,000-аар их байна.

Мөн Оросын зэвсэгт хүчин өнгөрсөн долоо хоногт SpaceX компани тэдний Starlink хиймэл дагуулын терминалуудыг салгаснаар том саадтай тулгарав. Оросууд “Starlink”-ийг харилцаа холбоо, их бууны онилгоо болон дроноо удирдахад ашиглаж байсан юм. Үүний үр дүнд фронт дахь дайралтын эрчим мэдэгдэхүйц буурсныг Украины цэргийн эх сурвалжууд мэдээлэв.

Украины Батлан хамгаалах яамны зөвлөх Сергей Бескрестнов хэлэхдээ “Оросын тал Starlink терминалыг өөрийн нэр дээр бүртгүүлж Оросуудад өгсөн урвагчдад 230 ам.доллар амлаж байна” гэв. Тэрээр “-Урвагчид яарахгүй байсан нь дээр, учир нь бид Starlink-ийн дугаарыг шалгаж байгаа бөгөөд 'хялбар мөнгөнд дурлагсад' 15 жил эсвэл бүх насаараа хоригдох ял авна” гэж сануулжээ.

ЭНХ ТАЙВНЫ ХЭЛЭЛЦЭЭ ЮУ, ЭСВЭЛ ТУЙЛДУУЛАХ ДАЙН УУ?

Энэ онд Абу-Дабид болсон Орос, Украин, АНУ-ын гурван талт хэлэлцээрийн хоёр үе шат нь олзны хүмүүсийг солилцоход хүргэсэн ч гал зогсоож чадаагүй байна. Оросын Гадаад хэргийн сайд Сергей Лавров өнгөрсөн оны 8-р сард Аляскад Ерөнхийлөгч Путин, Трамп нарын хооронд тохиролцсон "нууц нөхцөлүүдийг" Кремль шаардсаар байгааг дахин давтлаа.

Ерөнхийлөгч Зеленский 6-р сар гэхэд АНУ болон Орос улс Украин, Европыг оролцуулахгүйгээр тохиролцоонд хүрэхээс эмээж байгаагаа илэрхийлэв. Энэхүү цаг хугацаа нь 11-р сард болох АНУ-ын Конгрессын завсрын сонгуулийн өмнө Трампт давуу тал олгох зорилготой байж магадгүй гэж тэрээр үзэж байна.

ГАЗРЫН ТОСНЫ БҮРЭН ХОРИГ

2-р сарын 6-нд Европын Комисс (ЕК) Оросын дайны санхүүжилтийг таслах зорилгоор газрын тосны экспортод нь шинэ хориг тавих санал гаргав. Үүнд:

• Оросын далайн тээвэр болон газрын тосонд "далайн тээврийн үйлчилгээний иж бүрэн хориг" тавих.

• Оросын хориг арга хэмжээнээс зайлсхийж буй "сүүдрийн флотын" хөлөг онгоцны тоо 640-д хүрснийг илрүүлж, хоригт оруулах.

• Бүс нутгийн банкууд, криптовалют болон гуравдагч этгээдээр дамжих технологийн экспортод хязгаарлалт тогтоох.

Оросын экспортын хамгийн том зах зээлүүдийн нэг болох Энэтхэг улс АНУ-ын шахалтаар Оросын газрын тосноос татгалзаж эхэлсэн бөгөөд 3-р сарын дундаас хойш ямар нэгэн тээвэрлэлт захиалаагүй байгааг “Reuters” мэдээлэв. Европын комисс “Орос улс зөвхөн шахалтад орсон тохиолдолд л чин сэтгэлээсээ хэлэлцээрийн ширээний ард суух болно. Энэ бол Оросын ойлгох цорын ганц хэл шинжлэл юм” гэж мэдэгджээ.