Пап Лео Норвегийн хаан V Харальд таалал төгссөнд гашуудал илэрхийллээ

Vatican News

Пап Лео XIV нь Норвегийн шинэ Хаан VIII Хаакон болон Норвегийн ард түмэнд Хаан V Харальд таалал төгссөнд эмгэнэл илэрхийлж, таалал төгссөн Хааны Скандинавын үндэстэндээ зориулсан олон арван жилийн "үнэнч зүтгэл"-ийг өндрөөр үнэлэв.

Норвегийн Хаан V Харальд цусны хүнд эмгэгээ эмчлүүлэхээр өнгөрсөн долоо хоногт Ослогийн Их сургуулийн Рикшоспиталет эмнэлэгт хэвтээд байсан бөгөөд баасан гаригийн өглөөний 06:35 цагт тус эмнэлэгт таалал төгссөн юм. Хаан V Харальд 35 гаруй жил хаан ширээнд суусан нь түүнийг Хаан VII Хааконы үеэс хойшхи Норвегийн хамгийн олон жил хаанчилсан монарх болгосон билээ. Таалал төгссөн Хааны хүү, Угсаа залгамжлах хунтайж Хаакон түүний хаан ширээг залгамжлан Хаан VIII Хаакон болж байна.

Эзэн хаан таалал төгссөнөөс хэдэн цагийн дараа Пап Лео Хаан VIII Хааконд эцэг нь таалал төгссөнд эмгэнэл илэрхийлсэн цахилгаан мэдээ илгээжээ. Пап Хаан Харальд таалал төгссөнийг сонсоод маш их харамсаж байгаагаа илэрхийлж, шинэ Хаан, хааны гэр бүлийн гишүүд болон Норвегийн бүх ард түмэнд "чин зүрхний эмгэнэл" илэрхийлсэн байна.

"Түүний эх орныхоо төлөө олон жилийн турш бүтээлч, үнэнчээр зүтгэж ирснийг санаж, энэхүү зүтгэл нь цаашид ч үр дүнгээ өгнө гэдэгт итгэж байна" хэмээн Пап Лео хэлээд, "Таалал төгссөн Хааны сүнсийг мөнхөд тайван амгалан байлгахын тулд залбирч байгаагаа батлан илэрхийлье" гэжээ. Эцэст нь Ариун Эцэг Норвегийн ард түмэн болон түүнийг алдсандаа гашуудаж буй бүх хүмүүст Бурханы тайтгарал, энх тайвны адислалыг чин сэтгэлээсээ даатгав.

Тронхейм хотын хамба лам бөгөөд Тромсёгийн Апостолик администратор Эрик Варден мөн адил эмгэнэл илэрхийлэхдээ, өнөөдөр V Харальд махан биеийн үхлээс амьдрал руу шилжлээ гээд "бид түүнийг Бурханы хайр ба нигүүлсэлд хүндэтгэл, талархалтайгаар даатгаж байна" гэв. Тэрбээр Хаан Харальд үндэстнийг "үлгэр жишээ байдлаар тодорхойлж байсан" гэдгийг онцлов.

"Тэр биднийг харж, мэдэж, үнэлдэг байсныг бид мэдэрдэг байсан" хэмээн тэрбээр хэлээд, "Бид түүний халамжийг мэдэрч, түүний цацруулж байсан дулаан илчээр тэврүүлдэг байлаа. Тэр бидэнд зүтгэлийн агуу том үлгэр жишээг үзүүлсэн" гэж нэмж хэлэв. Хамба лам Варден Харальд "ард түмэндээ бүрэн зориулагдсан, үнэхээр бидний хаан байсан. Ямар ч аминч үзэл түүнд саад болоогүй. Энэ нь түүнийг бидэнд маш тустай бөгөөд ашигтай арга замаар ойртуулж өгсөн юм" хэмээн онцолжээ. Эцэст нь Хамба лам Норвегийн католик шашинтнууд таалал төгссөн Хаан, хааны гэр бүл болон шинэ Хааны төлөө залбирч байгааг дахин батлав.