Сөүл: AI-ийн ашгаа үл хөдлөх хөрөнгө рүү цутгаж байна

Технологийн өсөлтийн үед засгийн газар хөрөнгө оруулагчдыг үл хөдлөх хөрөнгөөс мөнгөө холдуулахыг ятгаж байна

The Financial Times

Өмнөд Солонгосын жижиглэнгийн хөрөнгө оруулагчид дэлхийд тэргүүлж буй хөрөнгийн зах зээлээс олсон ашгаа хэт халсан үл хөдлөх хөрөнгийн салбар руу эргүүлэн оруулж байгаа нь үл хөдлөх хөрөнгийн эрэлтийг хөргөх гэсэн засгийн газрын хүчин чармайлтыг мухардуулж байна.

Үл хөдлөх хөрөнгө, газрын яамны мэдээгээр, дөрөвдүгээр сард хийгдсэн 1.5 тэрбум вон ($974,000)-оос дээш үнэтэй орон сууц худалдан авалтын 13.2 хувийг үнэт цаас борлуулсны орлогоор санхүүжүүлжээ. Энэхүү үзүүлэлт анх удаа хоёр оронтой тоонд хүрсэн бөгөөд өнгөрсөн таван жилийн ихэнх хугацааны сарын дундаж түвшнээс бараг гурав дахин өссөн үзүүлэлт юм.

Сөүл хотын өмнөд хэсэгт орших Ёнгин хотын технологийн ажилтан, хувьцаанаас саяхан 20 сая воны ашиг олсон Ким Вон Ик хэлэхдээ: "Хэрэв хүмүүс хувьцаанаас их мөнгө олбол тэр нь эргээд л үл хөдлөх хөрөнгийн зах зээл рүү орж дуусдаг. Үүний үр дүнд эерэг биш, харин маш аюултай чөтгөрийн тойрог үүсэж байна" хэмээн анхааруулав.

Олон жилийн турш Өмнөд Солонгосын засгийн газар иргэдээ дотоодын хувьцаанд илүү их хөрөнгө оруулж, хэт халсан үл хөдлөх хөрөнгийн зах зээлээс холдуулахыг хичээж ирсэн. Тэд үл хөдлөх хөрөнгийн хэт хөөсрөлтийг тэгш бус байдал гарах, орон сууцны өндөр өртгөөс болж залуу хосууд гэр бүл зохиохоос татгалзан төрөлт огцом буурах гол шалтгаан гэж буруутгадаг.

Өнгөрсөн жил ажилдаа орсон Ерөнхийлөгч Ли Жэ Мён улс орны баялгийг үл хөдлөх хөрөнгийн "бүтээмжгүй" хөрөнгө оруулалтаас өөр тийш чиглүүлнэ гэж амлаж байсан юм.

Энэ оны эхнээс Өмнөд Солонгосын хөрөнгийн биржийн гол индекс болох Kospi хоёр дахин өсөж, хоёр жил дараалан дэлхийн хамгийн өндөр өсөлттэй гол индекс болох замдаа орлоо. Үүний гол хөдөлгөгч хүч нь хиймэл оюун ухааны (AI) өгөгдлийн төвүүдийн өргөтгөлөөс асар их ашиг хүртэж буй чип үйлдвэрлэгч "Samsung Electronics" болон "SK Hynix" компаниуд юм.

Хиймэл оюун ухааны чипний эрэлт хэрэгцээ асар их байгаагийн ачаар Даваа гаригт "SK Hynix" компани 20 гаруй жилийн турш тэргүүн байраа хадгалж байсан "Samsung"-ийг гүйцэж, тус улсын хамгийн өндөр үнэлгээтэй компани боллоо.

Энэхүү өсөлтийг үл харгалзан "Morgan Stanley"-ийн эдийн засагч Кэтлин Ох-ийн мэдээлснээр, үл хөдлөх хөрөнгө нь өрхийн баялгийн 75 хувийг эзэлж байгаа нь бусад өндөр хөгжсөн орнуудын түвшнээс хамаагүй өндөр бөгөөд хувьцаанд эзлэх 9 хувийн жинг хол давж байна. Мөн Өмнөд Солонгосын өрхийн өр нь өрхийн цэвэр орлогын бараг 175 хувьд хүрсэн нь Эдийн засгийн хамтын ажиллагаа, хөгжлийн байгууллага (OECD)-ын орнууд дундаа зургаадугаарт орох өндөр үзүүлэлт юм.

Энэхүү туйлшралыг AI-ийн тэсрэлтээс өмнөх Kospi индексийн уналттай байдлаар тайлбарлаж болно. "Kookmin Bank"-ны мэдээгээр, 2015-2025 оны хооронд тус индекс ердөө 25 хувиар өссөн бол яг ижил хугацаанд Сөүл хотын орон сууцны дундаж үнэ 50 гаруй хувиар өсжээ.

Өмнөд Солонгосын Ерөнхийлөгчийн бодлогын ахлах зөвлөх Ким Ён Бом бямба гаригт сошиал хуудаснаа "Хэрэв хагас дамжуулагчийн үйлдвэрлэлээс бий болсон үндэсний баялаг үл хөдлөх хөрөнгийн хөдөлмөрлөөгүй орлогод шингэж, өсөлтийн үр шим нь зөвхөн цөөн хэдэн хүмүүсийн гарт төвлөрвөл энэ тэсрэлт удаан үргэлжлэхгүй" хэмээн хувьцааны ашгаас үүдэлтэй илүүдэл капитал үл хөдлөх хөрөнгийн хөрөнгө оруулалтыг өдөөж байгаад анхааруулжээ.

"Kookmin Bank"-ны мэдээлснээр, нэгдүгээр сарын сүүлээс тавдугаар сарын сүүлч хүртэл Сөүл хотын орон сууцны үнэ 3.1 хувиар, харин нийслэл орчмын бүс нутагт үнэ 1.9 хувиар өссөн байна. Засгийн газрын зүгээс зээл олголтыг чангаруулж, эрэлт ихтэй дүүргүүд дэх гүйлгээг хязгаарлан, үнэтэй орон сууцнуудад зээлийн дээд хязгаар тогтоож, олон орон сууц эзэмшигчдэд татварын шийтгэл ногдуулах зэрэг зах зээлийг хөргөх олон бодлого хэрэгжүүлсэн ч үнэ өссөөр байна.

"Солонгосын корпорацийн засаглалын форум"-ын дарга Наму Ри "Гурваас дөрвөн арваны турш тогтсон сэтгэлгээг өөрчлөх хэцүү" гэдгийг хүлээн зөвшөөрөв.

Гэсэн хэдий ч "Morgan Stanley"-ийн эдийн засагч Ох хөрөнгийн зах зээлийн өсөлт нь өөрчлөлт авчирч магадгүй гэж үзэж байна. Тэрбээр 2019 онд хүн амын дөнгөж 21 хувь нь брокерын данстай байсан бол одоо Өмнөд Солонгосын хүн амын тал хувь нь данстай болж, хувьцааны талаарх мэдлэг нь дээшилснийг тэмдэглэв.

Сөүл хотын оффисын ажилтан Ким Мин Жун "Үдийн хоолны үеэр хүмүүсийн ярьдаг ганц сэдэв бол: 'Чи ямар хувьцаа авсан бэ? Хэдийг олсон бэ?' гэдэг асуулт. Хэрэв чи хувьцаа арилждаггүй бол тэнэг хүн шиг харагддаг" гэжээ.

Зах зээл хэт халж буй шинж тэмдгүүд аль хэдийн илэрч байна. Зургаадугаар сарын эхээр Kospi индексийн хэлбэлзлийн индекс түүхэн дэх хамгийн дээд цэг болох 94-т хүрсэн. Жижиглэнгийн хөрөнгө оруулагчид бооцоогоо нэмэгдүүлэхийн тулд зээл авснаар маржин арилжааны өр түүхэндээ байгаагүй өндөр түвшинд хүрч, 37 их наяд вон болж өсжээ.

Тавдугаар сарын сүүлчээр "Samsung" болон "SK Hynix"-тэй холбоотой хөшүүрэгтэй (leveraged) нэг хувьцааны ETF-үүд гарсанаас хойш 7 их наяд гаруй вон тус сангууд руу цутгасан байна. Гэвч энэ сард Kospi индекс нэг өдрийн дотор 8 хувиар унаснаар зарим ETF эзэмшигчид асар их алдагдал хүлээжээ. Ли Чан Жин (Санхүүгийн хяналтын албаны дарга) Даваа гаригт уг ETF-ийг "яаруу" гаргасандаа харамсаж байгаагаа илэрхийлээд, ихэнх хөрөнгө оруулагчид дундаж болон ажилчин ангийнхан тул гэнэтийн савлагаа тэдэнд хүнд цохилт болно гэдгийг анхааруулав.

Ажилтан Ким Мин Жун хэлэхдээ, засгийн газрын зүгээс хичнээн оролдсон ч хүмүүсийн үл хөдлөх хөрөнгө рүү тэмүүлэх сэтгэлгээг өөрчлөхөд хэцүү байх болно гэв. Тэрбээр "Хүмүүсийн сэтгэлгээнд хувьцаанаас бага зэрэг мөнгө олчихвол дээд зэрэглэлийн 1 хувийн элит бүлэгт багтаж, Гангнамд (баян дүүрэг) байр авч, амжилттай амьдарч чадна гэсэн ойлголт бат суусан байдаг" хэмээн тайлбарлажээ.