Тамга атгасан дарга байх уу, тамгаа Х.Баттулгад алдах уу?!

Ахиад л асууя, Г.Занданшатарыг огцруулах нь О.Цогтгэрэлийн хүсэл мөн үү. Аль эсвэл ардаа барьцаатай улс төр хийв үү.

Үнэнийг хэлэхэд Л.Оюун-Эрдэнийн үед Ардчилсан нам акц хийх нь байтугай, асуулт асуух ч эрхгүй байсан. Асуулт тавьж, шүүмжлэл хэлсэн болгон “Гэрэгэ15”--ын херопагандад хэрчүүлнэ, АТГ болон цагдаа, татварынхны занаанд орно. Бодит байдлыг биеэ туулсан хүн нь АН-ын гишүүн Ж.Баярмаа, МАН-ын гишүүн Д.Энхтүвшин байна.

Парламентын сонгуулийн дараа Л.Оюун-Эрдэнийн Засгийн газарт Ардчилсан нам хамтарч, найман сайдын суудлаар "шагнуулсан". Ингэснээр парламент нь Засгийн газартаа хяналт тавьж чадахгүйд хүрсэн. Засгийн газар нь парламентынхаа толгой дээр гараад суучихсан. Ийм л “диктатур”-тай “эвслийн” Засгийн газарт АН амаа ангайх ч эрхгүй байлаа.

Атал Г.Занданшатарын Засгийн газрыг огцруулах асуудлыг АН-ын дарга нь гаргаж тавина гэдэг нь ямартай сөрөг хүчний айдас алга болсон байна. Монголын улс төрд ардчилал эргэн сэргэж байна. Эрх баригчид хяналтад орж байна.

Л.Оюун-Эрдэнэ огцорсноор улс төр, эдийн засагт их олон зүйл өөрчлөгдсөн. Анд найзуудын авлигын баримтууд ар, араасаа дэлгэгдсэн. Д.Амарбаясгалан Бор тээгийн ордыг хууль бус аргаар авсан арга тактик ил болсон. Л.Оюун-Эрдэнийн засгийн үеийн нууцын тамгатай “Тамгагүй төр”-ийн санхүүжилтийг олон нийт мэдэж авсан.

Хэрэвзээ Л.Оюун-Эрдэнэ огцроогүй бол Монголд манж-мафийн дарангуйлал тогтох байсан. Төрийн хулгай луйвар, дээрэм тонуул ил цагаандаа гарах байж. Хувийн өмчийг хурааж, нийгэмчлэх ажиллагаа эрчимжих байсан. Өөрөөсөө өөр үзэл бодолтнуудыг авлигын хуулиар айлгаж, дарамталдаг шинэ үеийн хэлмэгдүүлэлтийг эхлүүлэх ч байв.

Нөгөө талдаа Л.Оюун-Эрдэнэ огцроогүй бол О.Цогтгэрэл Ардчилсан намын тамга атгаж чадахгүй. АН-ын даргаар О.Алтангэрэл, Э.Одбаяр хоёрын аль нэгийг МАНЖ мафи "томилох" байсан нь тодорхой. Нэг нь Женкогийн "тэжээсэн бяруу". Нөгөө нь Л.Оюун-Эрдэнийн АН дээр “аваачиж” тавьсан БЭТ. Үнэнийг хэлэхэд 2024 оны УИХ-ын сонгуулиар АН-ын ялалтыг Л.Оюун-Эрдэнэ бэлэглэсэн нь Э.Одбаяр. Энэ мэт манж мафийн БЭТ, бууны нохдоосоо АН салах ч ёстой, гадны гар хөлүүдийг цэвэрлэх ч шаардлагатай.

Өнгөрөгч зургадугаар сард МАН-ын Бага хурлаас Ардчилсан намтай хамтрахгүй гэсэн шийдвэр гарсан Монгол Улсын хувьд зөв шийдэл болсныг нуухгүй. Арчилсан нам сөрөг хүний байрандааа эргэж ирсэн. Үр дүнд нь Засгийн газар хяналттай болсон. Өнөөдөр АН-ын бүлэг Г.Занданшаатарын Засгийн газрыг огцруулна гэж акцилж буй нь эрх баригчид эргээд хяналтад орж байна гэсэн үг. Л.Оюун-Эрдэнийн үед Засгийн газар нь парламентынхаа дээр гараад суучихсан. Үг хэлсэн, шүүмжилсэн гишүүдийг Л.Оюун-Эрдэнэ индэр дээрээс зад загнадаг байлаа.

Гэхдээ өнөөдрийн улс төрд өрнөлөөс харахад АН-ын зорилго нь засгийг унагаахдаа биш Засгийн газартай тохироо хийх байж мэднэ. Өршөөлийн хуулиар уу, өөр бусад зүйлээр үү? Тэр тусмаа УИХ-ын чуулганд суух үндсэн үүргээ сонгогдсон цагаасаа л умартсан Х.Баттулга камерын өмнө гарч ирэх болсон нь айдас, хүйдэс.

УИХ-ын гишүүн Ж.Баярмаа, Д.Ганбат нарын Харбины гэрээг шалгах Түр хороо байгуулах тухай саналыг УИХ-ын Байнгын хороод дэмжсэн. Үүнтэй зэрэгцээд Засгийн газрыг огцруулах акц идэвхжих болсон нь Харбины сонсголыг аль болох саатуулах, сатааруулах гэсэн даалгавартай байж ч мэднэ.

Монголыг Хятадын хавханд оруулж, Харбины гэрээг байгуулахад хүргэсэн хамгийн гол буруутан нь Женко.Баттулга. Хэрэвзээ сонсгол хийвэл хятад цэрэг, танкны үлгэрээр херопаганда хийж, улсаа хэрхэн хорлосон нь ил болно. Оффтейк гэрээний ард олон $сая доллар хулгайлсан асуудал нь яригдана.

Үндсэндээ, Х.Баттулга камерт харагдах нь АН-д тусгүй, Монголын хувьд бүр муу. Тиймээс О.Цогтгэрэлийн эр зориг хийгээд ухаан нь хүрдэг бол АН-ыг Х.Баттулгын нөлөөнөөс гаргах ёстой. АН ч Х.Баттулгын нөлөөнөөс гарах цаг болсон.

Харин О.Цогтгэрэл Х.Баттулгын үгээр, хуурай ах Д.Дорлигжавын дохиураар дуугардаг утсан хүүхэлдэй байя гэвэл улс төр удахгүй. Түүнд хоёр л сонголт байна, тамга атгасан дарга байх уу, тамгаа Х.Баттулгад алдах уу? Давах би яараагүй байхад унах чи юунд яарнам гэгч болчих вий л гэж сануулсан төдий!