Трамп Ирантай хоёр долоо хоногийн хугацаанд гал зогсоохоор тохиролцов

АНУ-ын Ерөнхийлөгч Дональд Трамп Тегераны зүгээс ирүүлсэн 10 заалт бүхий төлөвлөгөөнд мэдэгдэхүйц ахиц гарсан болохыг онцлоод хэрэв Ормузын хоолойг нэн даруй эргүүлэн нээвэл Иранд хийх дайралтаа хоёр долоо хоногийн хугацаатай зогсоохоор тохиролцлоо.

АНУ-ын өндөр албан тушаалтны мэдээлснээр, Америкийн тал Ираны зүг хийж буй довтолгооны ажиллагаагаа түр зогсоогоод байна. Энэхүү мэдээний дараа хөрөнгийн зах зээл дэх фьючерс индексүүд огцом өсч, газрын тосны үнэ эрс буурч эхэллээ.

Өмнө нь буюу Мягмар гаригт Ерөнхийлөгч Трамп хэрэв Тегеран түүний шаардлагыг тус өдрийн оройн 20.00 цаг (АНУын Зүүн эргийн цагаар) гэхэд биелүүлэхгүй бол тус улсын соёл иргэншлийг бүхэлд нь газрын гадаргуугаас арчих болно гэж заналхийлээд байсан юм.

ГАЛ ЗОГСООХ ШИЙДВЭРИЙН ДАРАА АЗИЙН ХӨРӨНГИЙН ЗАХ ЗЭЭЛ СЭРГЭВ

Ерөнхийлөгч Трамп Ирантай гал зогсоохоор болсон тухай мэдэгдлийн дараа Азийн хөрөнгийн биржүүд бүхэлдээ өсөлттэй байна.

• Японы Nikkei индекс Лхагва гаригийн өглөөний арилжаагаар 5%-иар өссөн байна.

• Өмнөд Солонгосын Kospi индекс бараг 6%-иар өсчээ.

• Хонг Конгийн Hang Seng индекс 2.5%-ийн өсөлт үзүүлэв.

Брент маркийн газрын тосны фьючерс үнэ сүүлийн өдрүүдэд 110 ам.доллар орчимд хэлбэлзэж байсан бол одоо 96 ам.доллароос доош орж буурлаа. Газрын тосны үнийн энэхүү уналт нь Япон, Өмнөд Солонгос зэрэг газрын тосны томоохон импортлогч орнуудын хувьд нааштай үзүүлэлт болж байна. Гэсэн ч "Saxo Markets"-ийн шинжээч Чару Чанана "Хамгийн том сорилт бол энэ шийдвэр нь түр зуурын хэврэг зогсолт байх уу, эсвэл урт хугацааны тогтвортой хэлэлцээр болж хувирах уу гэдэгт байна" хэмээн тэмдэглэв.

ИРАНЧУУД ЯЛАЛТАА ТЭМДЭГЛЭЖ, ХАРИН ДЭГЛЭМИЙГ ЭСЭРГҮҮЦЭГЧИД СЭТГЭЛ ДУНДУУР БАЙНА

АНУ-тай хоёр долоо хоногийн хугацаатай гал зогсоох хэлэлцээр хийсэнд иранчууд баяр хөөрөөр дүүрэн байгаа ч сөрөг хүчнийхэн үүнд сэтгэл дундуур байгаагаа илэрхийллээ.

Тус улсын төв хэсгийн Исфахан, зүүн хэсгийн Керман хотууд болон Тегеран хотын захын дүүргүүдэд оршин суугчид байлдааны ажиллагаа зогссонд баярлан жагсаал зохион байгуулсан тухай төрийн мэдээллийн хэрэгслүүд болон иргэд мэдээлж байна.

ИЗРАИЛЬ ИРАНД ЦОХИЛТ ӨГСӨӨР БАЙНА

Гал зогсоох шийдвэр зарлагдсан хэдий ч Израиль улс Иранд цохилт өгсөөр байгаа тухай Израилийн Аюулгүй байдлын албаны эх сурвалж мэдээлэв. Гал зогсоох тухай мэдэгдлээс хойш Ираны зүгээс Израиль руу хэд хэдэн удаа пуужин харвасан байна.

Израилийн Ерөнхий сайдын ажлын албанаас энэ талаар тайлбар өгөх хүсэлтэд одоогоор хариу ирүүлээгүй байна.