“Үлдэх Зориг”-ийн үлдэх хэсэг

Сэтгүүлч Бүдрагчаагийн Оюунчимэг “Үлдэх Зориг” нэртэй баримтат хөрөг киногоо өчигдөр олонд толилууллаа. Өчигдөр буюу 4-р сарын 20 бол Санжаасүрэнгийн Зориг агсны төрсөн өдөр юм. Амьд сэрүүн байсан бол тэрээр өчигдөр 64 нас хүрэх байлаа.

Монгол Улс нийгмийн тогтолцоогоо өөрчилсөн ардчиллын он жилүүдэд Зоригоор бахархан хүндэлж явсан монголчуудын сэтгэлийг 1998 оны 10-р сарын 3-ны өглөө сонссон цочирдом мэдээ хормын дотор харууслаар дүүрсэн. Тэр харууслыг “Үлдэх Зориг” дахин сэдрээлээ.

Энэ кино Санжаасүрэнгийн Зориг агсан хэрцгийгээр алуулсан тухай биш, түүний хэргийг Монголын төр илрүүлэхийг хичээсээр байгаа тухай биш, түүний аллага увайгүй улстөрчдийн сонгуулийн сэдэв болсон тухай биш гэдгийг юун түрүүнд хэлье. Бас төдийгөөс өдий хүртэл Зоригийн талаар сонсож, дуулж, уншиж байснаас илүү цоо шинэ мэдээлэл байхгүй.

“Би түүний аллага, одоо ч энэ улс төрийн тоглоом болгон ашиглаад байгаа гэмт хэргийн тухай дуугарахгүй гэж л шийдсэн. Угаасаа мэдэх ч үгүй юм чинь. Тэгээд улс төрийн “У” үсэггүй, аллагын талаарх “А” үсэггүйгээр баримтат киногоо хийх гэж л зорьсон. Нөгөө талаас өнөөдрийн залуу үеийнхэнд “Өө, Зориг гэдэг чинь ийм хүн байж” гэдгийг бодитой, үнэн ойлгоход нь жаахан ч болов тус нэмэр болох сон гэж хичээсэн” хэмээн ub.life сайтад өгсөн ярилцлагаа Б.Оюунчимэг тайлбарласан байсан.

Санжаасүрэнгийн Зориг гэдэг хүн ямар үзэл санааг баримталж байв, тэр юунд зорьж байв, Монголын ирээдүйг хэрхэн төсөөлж байв гэдгийг харуулахыг зорьжээ. Тиймээс өчигдөр Корпорэйтэд ирсэн найз, ойр дотныхон, хамтран зүтгэгчид, дэмжигчдээс илүүтэй Зоригийг сургаар мэддэг залуу үеийнхэн заавал үзэх кино болжээ.  

“Нэрийг нь дэвшүүлэхгүй л байна биз, алаад байхдаа яахав дээ” гэсэн ах Баярын цөхөрлийн нулимс, “хэргийг чинь илрүүлж чадаагүйд уучлаарай” гэсэн дүү Оюуны үг, “энэ хэргийг монгол хүн хийгээгүй байх” гэсэн ээжийнх нь дурсамж “Үлдэх Зориг”-ийн үлдэх хэсэг байлаа.

Надаас нэг ах хүн

Б.Батзаяа

Тэр монгол хүний саруул ухаанд итгэдэг байсан

Тэр хүний саруул ухаанд итгэдэг байсан

Тэр саруул ухаанд итгэдэг байжээ

Тэр ухаанд итгэдэг байжээ

Тэр итгэдэг байжээ

Тэр байжээ

Байжээ

...

Байжээ

Тэр байжээ

Тэр итгэдэг байжээ

Тэр ухаанд итгэдэг байжээ

Тэр саруул ухаанд итгэдэг байжээ

Тэр хүний саруул ухаанд итгэдэг байжээ

Тэр монгол хүний саруул ухаанд итгэдэг байжээ