Зеленский: Путин дэлхийн III дайныг эхлүүлсэн, тэр л зогсоох ёстой!

Өнөөдөр ОХУ нь Украин улсад халдан довтолсон “Цэргийн тусгай ажиллагаа” гэгчээс хойш яг 4 жил болж байна. Украины Ерөнхийлөгч Володимир Зеленскийн Би Би Си (BBC)-н Жереми Боуэн (Jeremy Bowen)-д 2026-02-22 нд өгсөн ярилцлагыг тоймлон хүргэе.

Украины ерөнхийлөгч Володимир Зеленский эрс шийдэмгий, бууж өгшгүй байр сууриа үргэлжлүүлэн илэрхийлсээр байна. Киев дэх засгийн газрын байранд болсон энэхүү уулзалтын үеэр тэрээр "Украин ялагдах бус, харин дайныг ялалтаар дуусгах болно" гэдгээ итгэл төгс мэдэгдлээ.

Ерөнхийлөгч Владимир Путины шаардаж буй гал зогсоох хэлэлцээрийн нөхцөлийг Зеленский эрс эсэргүүцэв. Оросын тал олон арван мянган цэргийнхээ амиар сольж байж ч эзэлж чадаагүй стратегийн чухал бүс нутгуудаас Украиныг ухрахыг шаардаж байгаа юм.

Донецк мужийн 20%, Херсон болон Запорожье мужийн газар нутгийг Орост шилжүүлэн өгөх нь Зеленскийн хувьд ердөө "газар нутаг" алдах асуудал биш юм.

Тэрбээр үүнийг "орхиж хаях" буюу тэнд амьдарч буй зуу зуун мянган иргэнээсээ урваж буй хэрэг, мөн Украины нийгмийг хагалан бутаргах алхам гэж үзэж байна.

Зеленскийн үзэж буйгаар Путин дэлхийн гуравдугаар дайныг хэдийнэ эхлүүлсэн. Орос улс дэлхий ертөнцөд өөрсдийн амьдралын хэв маягийг тулгаж, хүмүүсийн сонгосон эрх чөлөөг өөрчлөхийг хүсэж байна.

"Хэрэв бид одоо Путинд буулт хийж, түүнд амсхийх хугацаа олгох юм бол тэр 2-3 жилийн дараа хүчээ зузаатгаад дараагийн улс руугаа дайрах болно. Тэр Украинд зогсохгүй гэдэг нь тодорхой".

АНУ-ын Ерөнхийлөгч Дональд Трамп болон түүний дэд ерөнхийлөгч Жэй Ди Вэнс нар Украиныг хэлэлцээрийн ширээнд яаралтай суухыг шаардаж байгаа билээ.

Жилийн өмнө Зеленскийг Цагаан ордонд зочлоход Трамп, Вэнс нар дэлхийн хэвлэл мэдээллийн өмнө түүнд "дипломат дээрэм" гэж нэрлэж болохуйц хүчтэй шахалт үзүүлсэн. Тэд Байдены үеийн дэмжлэг дууссаныг тодорхой зарласан юм.

Одоогоор АНУ цэргийн тусламжаа бараг зогсоосон ч тагнуулын мэдээллээр хангасаар байгаа бөгөөд Европын орнууд АНУ-аас зэвсэг худалдан авч Украинд нийлүүлж байна.

Трамп нь Зеленскийг "дайныг эхлүүлсэн дарангуйлагч" гэж Путины үгийг давтан гүтгэж байсан удаатай. Үүнд Зеленский инээд алдан "Би дарангуйлагч биш, дайныг ч эхлүүлээгүй" гэж хариулжээ.

Зеленскийн хувьд ялалт гэдэг нь зөвхөн байлдааныг зогсоох бус, харин Украины тусгаар тогтнолыг хадгалж үлдэх. 1991 оны хилийн шугамыг бүрэн сэргээж, Путиныг зогсоож, дэлхий ертөнцөд шударга ёсыг тогтоох явдал юм.

Тэрбээр "Хүмүүсгүй газар нутаг бол юу ч биш" гэдгийг хүлээн зөвшөөрч байгаа ч, газар нутгаа эргүүлэн авах нь цаг хугацааны асуудал бөгөөд энэ нь зөвхөн Украинаас бус, түншүүдийн нийлүүлэх зэвсгээс хамаарна" гэв.

Трампын зүгээс Украиныг ирэх зун гэхэд ерөнхийлөгчийн сонгууль явуулахыг шаардаж байгаа. Гэвч дайны нөхцөлд, сая сая дүрвэгсэдтэй үед сонгууль явуулах нь техникийн болон хууль зүйн асар их саадтайг Зеленский тайлбарлалаа.

Зеленский АНУ-ын ерөнхийлөгчид бус, харин Конгрессоор батлагдсан 30 жилийн хугацаатай аюулгүй байдлын баталгааг хүсэж байна. "Ерөнхийлөгч нар солигддог ч институцүүд үлддэг" гэж тэр онцолсон байна.

Дараагийн сонгуульд нэр дэвших эсэхээ хараахан шийдээгүй байгаа бөгөөд "Нэр дэвших ч магадлалтай, үгүй ч байж магадгүй" гэсэн хариулт өгөв.

Ярилцлагын төгсгөлд ноён Зеленский англи хэлээр энэ дайн бол олон талт шатар тоглохтой адил бөгөөд Путиныг зогсоох “олон арга замуудын” нэг нь заавал амжилтад хүрнэ гэдэгт итгэж байгаагаа хэлэв. Хэдийгээр Путин дайныг зогсоох хүсэлгүй байгаа ч, "хүсэхгүй байна гэдэг нь зогсохгүй гэсэн үг биш" хэмээн найдаж буйгаа илэрхийлээд ярилцлагаа өндөрлүүллээ.

Дашрамд хэлэхэд 2026 оны эхний байдлаар Украины зэвсэглэлийн нөхцөл байдал өсөлт болон хомсдол хосолсон, "өөрийгөө хангах" чиглэл рүү эрчимтэй шилжиж буй дүр зурагтай байна.

Украины батлан хамгаалах салбарын өнөөгийн нөхцөл байдлыг дараах үндсэн чиглэлүүдээр багцлан харж болно.

• Украин улс гадны тусламжаас хамааралтай байдлаа бууруулахын тулд дотоодын цэргийн үйлдвэрлэлээ ер бусын хурдацтай хөгжүүлж байна.

• 2026 онд Украин 7 сая гаруй дрон үйлдвэрлэхээр төлөвлөж байна. Үүнд зөвхөн жижиг FPV дрон төдийгүй, Оросын гүн рүү цохилт өгөх чадвартай алсын тусгалын дронууд багтаж байгаа юм.

• Герман, Их Британи зэрэг улсуудад Украины технологиор дрон үйлдвэрлэх шугамууд ашиглалтад орж байна.

• Украин түүхэндээ анх удаа дайны үед зэвсэг (технологи) экспортолж, олсон орлогоороо дотоодын үйлдвэрлэлээ санхүүжүүлэх "хяналттай экспортын" горимд шилжсэн.

Агаарын довтолгооноос хамгаалах систем (АДХ) ба нисэх хүчин бол Украины хамгийн эмзэг бөгөөд хамгийн чухал салбар юм.

Зеленскийн мэдэгдсэнээр, АНУ Patriot пуужингийн лицензийг Украинд эсвэл Европын холбоотнуудад (Польш, Румын) олгохоос татгалзсан хэвээр байна. Энэ нь пуужингийн нөөц гадаад нийлүүлэлтээс бүрэн хамааралтай хэвээр байгааг харуулж байна.

Украины тэнгэрт F-16 сөнөөгч онгоцууд хэдийнэ үүрэг гүйцэтгэж байгаа бөгөөд 2026 онд Шведийн JAS 39 Gripen болон Францын Mirage 2000 онгоцуудыг нэмж хүлээн авахаар хүлээгдэж байна.

Нэг бүр нь 4-10 сая долларын өртөгтэй Patriot-ын замаас саатуулагч пуужингуудын нөөц тун бага байгаа бөгөөд Европ дахь нөөц шавхагдаж байгааг холбоотнууд анхааруулж байна.

Хуурай замын байлдааны гол хүч болох их бууны сумны хомсдол хамгийн том асуудал хэвээр байна.

Дэлхий даяар сум худалдан авах "Чехийн санаачилга" нь 2026 онд 5 тэрбум еврогийн санхүүжилт шаардлагатай байгаа ч одоогоор ердөө 1.4 тэрбумыг босгоод байна.

АНУ-ын 155мм-ийн сумны үйлдвэрлэл сард 100 мянган нэгжид хүрэх зорилтоо 2026 оны дунд үе хүртэл хойшлуулсан нь фронт дээрх сумны "хоолны дэглэм"-ийг үргэлжлүүлэхэд хүргэж байна.

АНУ-ын шууд тусламж зогссонтой холбоотойгоор Украин "Дани загвар"-ыг ашиглаж байна. Энэ нь барууны орнууд Украинд зэвсэг бэлэглэх бус, харин Украины өөрийнх нь үйлдвэрүүдэд захиалга өгч, мөнгийг нь төлөх замаар зэвсэг үйлдвэрлүүлэх арга юм. Энэ нь ложистикийн зардлыг бууруулж, үйлдвэрлэлийг хурдасгаж байна.

Украин технологийн хувьд (дрон, цахим дайн) давуу тал олж байгаа ч, стратегийн чухал зэвсэг болох агаарын довтолгооноос хамгаалах пуужин болон их бууны сумны хувьд Барууны улс төрийн шийдвэрээс маш их хамааралтай хэвээр байна.