Шар дэнлүү ба дорнын гэгээнтний нууц

Ванжүн Ши (Wanjun Xie 谢万军)-гийн  Хятадын удирдагчдын мухар сүсгийн талаарх “Х” дээр бичсэн ёгтлолыг бичсэнийг тоймлон хүргэе.

Хятадын эртний домогт "Ниань" хэмээх догшин мангас жил бүрийн битүүний шөнө тосгонд нэвтэрч, мал сүргийг идэж, хүмүүст гай зовлон учруулдаг байсан тухай өгүүлдэг. Хүмүүс уг мангасыг улаан өнгө, галын гэрэл болон чанга чимээнээс айдаг болохыг олж мэдээд, үүд хаалгандаа улаан жигшээ (ерөөлийн үгс) нааж, улаан дэнлүү өлгөн, хулс шатааж (салют буудуулж), шөнөжин унталгүй түүнийг хөөн явуулдаг уламжлалт ёс заншилтай.

Гэвч, энэхүү ёс заншил, Хятадын ард түмний баяр баясгалан Ши Жиньпиний хувьд хамгийн том зовлон болдог гэлтэй. Ямартай ч мангасыг хөөх ёс заншлыг болиулах зорилгоор, улс орон даяар салют, тэсрэх бодис хэрэглэхийг хатуу хориглосноор цагдаа нар айл бүрийн хаалгыг тогшиж, нэгжлэг хийх болсон байна.

ШАР ДЭНЛҮҮНИЙ НУУЦ АЖИЛЛАГАА БА "УЛААН МОРИН, УЛААН ХОНИН" ЖИЛИЙН ГАЙ

Фэнг шүйгийн нэгэн мастер Ши Жиньпинд зөвлөхдөө "Улаан морин" болон "Улаан хонин" жилийн (Гал морин, Гал хонин жилүүд) гай гамшгаас зайлсхийх, мөн "Дорнын гэгээнтэн" төрөн гарахаас сэргийлэхийн тулд хаа сайгүй шар дэнлүү өлгөх ёстойг зөвлөсөн гэх. Үүний үр дүнд Бээжингийн гудамж талбай, алслагдсан гудамжууд ч шар дэнлүүгээр дүүрсэн байна.

Дотоод эх сурвалжийн мэдээлснээр, эрх баригчид "Дорнын гэгээнтэн" тодрохоос сэргийлж "Шар гэрлийн ажиллагаа" эхлүүлсэн боловч Ши Жиньпин өөрөө үүнийхээ сөрөг үр дагаврыг амсаж эхэлжээ. 2026 оны 2-р сард Ши Жиньпин Улсын аюулгүй байдлын яаманд тушаал өгч, улс даяар олон хотод шар дэнлүү байршуулсан байна. Олон нийтийг төөрөгдүүлэхийн тулд зарим орон нутгийн засаг захиргаа "шар өнгө бол хааны сүр хүчийг бэлгэддэг" гэж тайлбарласан бол, зарим нь "бараа хүргэлтийн алдаа" гэж мэдэгджээ. Гэвч шар дэнлүүний чимэглэлийг харсан сая сая иргэд үүнийг "шашны зан үйл" шиг харагдаж байгааг шивнэлдэх болсон байна.

ГЭНЭТИЙН ӨВЧИН БА ЯАРАЛТАЙ АРГА ХЭМЖЭЭ

Шар дэнлүү өлгөөд гурав хоносны дараа Ши Жиньпиний бие гэнэт муудаж, цээж нь давчдах, амьсгал давчдах, гар хөл нь сульдах шинж тэмдэг илэрчээ. Эмч нар удаа дараа шинжилгээ хийсэн ч ямар нэгэн тодорхой шалтгаан олж чадаагүй байна. Ши Жиньпин өөрийн хувийн зөн билэгчийг дуудаж учрыг асуухад, зөн билэгч "Шар дэнлүү нь гай гамшгийг зайлуулж, Дорнын гэгээнтнийг төрөхийг саатуулж байгаа ч, түүний хэт их 'хар энерги' болон ард түмний дунд тархсан Ши даргатай холбоотой сөрөг бодлууд нь муу ёрын сүнснүүдийг өөртөө татаж, таны амин энергийг гэмтээж, насыг тань богиносгож байна. Хэрэв шар дэнлүүнүүдийг яаралтай буулгахгүй бол таны амь нас эрсдэж болзошгүй" гэж анхааруулжээ. Үүний дараа Улсын аюулгүй байдлын яам шөнө дөлөөр тушаал гаргаж, бүх шар дэнлүүг буулган, яаралтай улаан дэнлүүгээр солих ажиллагааг Бээжингээс эхлэн зохион байгуулсан байна.

2013 ОНЫ НУУЦ ЗАН ҮЙЛ: ЛУУГИЙН СҮҮЛЭЭР ДАРАХ НЬ

Ши Жиньпин 2013 онд Бээжингийн нэгэн их сургуульд нууцаар очиж, "Дорнын гэгээнтэн"-ийг 12 жилийн турш дарах зан үйл үйлдсэн гэх мэдээлэл байна. Тэрбээр БНХАУ-ын дээд удирдагчийн албан тушаалыг авахаасаа өмнө 15 хоногийн турш олны нүднээс гэнэт алга болсон юм. Тэр үед тэрээр ордны зөн билэгчийн зөвлөснөөр өөрийгөө "Тэнгэрийн хүү" (Son of Heaven) хэмээн итгэж, "луугийн сүүл"-ийг ашиглан Дорнын гэгээнтнийг 12 жилийн турш гарч ирж чадахгүй болтол нь дарах зан үйл хийжээ. Гэвч зөн билэгч түүнд "Энэ зан үйл нь гэгээнтнийг 12 жил дарж чадах ч, 12 жилийн дараа та өөрөө хариу цохилт (backlash) амсаж, өвчин зовлонд нэрвэгдэх болно" гэж анхааруулсан байдаг. Эрх мэдэлд шунасан Ши Жиньпин ирээдүйд ирэх өвчин зовлонг үл тоон уг зан үйлийг гүйцэтгэсэн гэдэг.

Ши Жиньпиний гэнэт алга болсон нь олон улсын хэвлэл мэдээллийнхнийг гайхашруулж байв. 13 хоногийн дараа "Синьхуа" агентлаг түүнийг Бээжингийн нэгэн их сургуульд шинжлэх ухааныг сурталчлах ажлаар зочилж буй гэрэл зургийг нийтэлсэн юм. Улс орны удирдагч болох шийдвэрлэх мөчид ийм жижиг сажиг ажил хийж явах нь үнэхээр утгагүй бөгөөд "Синьхуа" агентлаг хуурамч мэдээлэл тараасан гэж олон улсын ажиглагчид дүгнэж байлаа.

ЗЯН ЗЭМИНИЙ ЗӨН БИЛЭГЧ БА "ДОРНЫН ГЭГЭЭНТЭН"

Дотоод эх сурвалжийн мэдээлснээр, 1999 оны хавар Зян Зэминий томилсон зөн билэгч "Дорнын гэгээнтэн" тодорч магадгүй гэж анхааруулж байжээ. Зян Зэминь Лоянь хотоос нэгэн алдартай мэргэн хүнийг Жуннаньхайд урьж ирүүлэн хувийн зөн билэгчээ болгосон байна. Зян Зэминий даалгавраар уг мэргэн хүн хоёр бүлэг хүмүүсийн хувь заяаг алсын зайнаас шинжжээ.

Тэдний орд, ивээл жил нь Зян Зэминийхтэй таарч байгаа эсэхийг тодорхойлж, таарч байвал тушаал дэвшүүлж, таарахгүй бол албан тушаалаас нь буулгах эсвэл зайлуулах бодлого баримталсан.

Дотоод, гадаадын улс төрийн тэрслүү үзэлтнүүдийн хэн нь "социализмын булш ухагч" буюу аюултай этгээд болохыг тодорхойлохыг оролдсон байна.

Тэр үед уг ордны зөн билэгч "Дорнын гэгээнтэн" байж болзошгүй нэгэн хүнийг зааж өгсөн бөгөөд эрх баригчид тэр хүнийг удаан хугацааны турш ажиглаж, хянаж, хавчин гадуурхсаар ирсэн байна. Мэдээж энэ бол хилс хэлмэгдүүлэлт юм.

Нэмж сонирхуулахад Путины хувьд түүний "мухар сүсэг" нь Оросын уламжлалт Үнэн алдартны шашны ид шидийн үзэл (mysticism) болон Сибирийн бөө мөргөлийн хачирхмаар холимог зан үйлтэй гэж ажиглагчид үздэг.

Батлан хамгаалахын сайд асан Сергей Шойгу (Тува гаралтай) Путиныг Сибирийн бөөгийн зан үйлд уруу татсан гэх яриа бий. Тэд Тувагийн тайгад амрахдаа хандгайн залуу эвэр буюу "пант"-ын цустай усанд орж залууждаг, энэ нь эрч хүч өгдөг гэх мэдээлэл олон улсын хэвлэлүүдээр (жишээ нь, Der Spiegel) гарч байсан.

2019 онд Якутын бөө Александр Габышев Путиныг "чөтгөр" хэмээн нэрлэж, түүнийг Кремлиэс зайлуулах зан үйл хийхээр Москва руу явган аялал эхлүүлсэн. Хачирхалтай нь, Оросын төр засаг энэ "галзуу" мэт харагдах бөөгөөс маш их айж, түүнийг замаас нь баривчлан, сэтгэцийн эмнэлэгт албадан хэвтүүлсэн нь Путиныг далд хүчний хараал зүхлээс үнэхээр айдаг гэх хардлагыг төрүүлсэн юм.

Путин чухал шийдвэрүүдээ давхцсан тоотой өдөр гаргах дуртай гэгддэг. Жишээ нь:

Гүржийн дайн: 08.08.2008  (наймын тооны давхца)

Украины түрэмгийлэл: 24.02.2022 (хоёр болон дөрвийн тооны давхцал).

Социалист систем албан ёсоор атеист (шашингүй үзэлтэй) гэдэг байсан ч удирдагчид нь "нууц зөвлөхүүдтэй" байв.

Сталин шашны сургуульд сурч байсан хүний хувьд далд ертөнцийг сайн мэддэг байжээ. Тэрээр алдарт зөн билэгч, телепат Вольф Мессингтэй ойр харилцаатай байсан гэдэг. Сталин Мессингийг шалгахын тулд "Кремлийн хамгаалалтыг нэвтэрч орж ир", "Төв банкнаас хоосон цаасаар мөнгө авч гар" гэх мэт даалгавар өгч, түүнийг чадвартайг нь мэдээд өөртөө зөвлөхөөр авсан гэх домог бий.

Маогийн хувийн хамгаалалтын албыг "8341 дүгээр анги" гэж нэрлэдэг байв. Үүний цаана нэгэн нууцлаг түүх байдаг. Мао залуу байхдаа Даогийн нэгэн лам дээр очиход түүнд "8341" гэсэн тоо хэлжээ. Мао энэ тооны учрыг ололгүй хамгаалалтын албандаа өгсөн гэдэг. Гэтэл Мао 83 наслаад, Хятадын Коммунист намыг яг 41 жил удирдсаны дараа нас барснаар энэ тооны учрыг тайлсан гэж үздэг.

Зөвлөлтийн "зогсонги байдлын" үеийн удирдагч Брежнев өөрийн эрүүл мэнддээ маш их санаа зовдог байсан. Тэрээр Гүрж гаралтай алдарт зөн билэгч, энергиэр эмчлэгч Жуна Давиташвилиг Кремльд авчирч, өөрийгөө эмчлүүлдэг байв. Тэр үед Зөвлөлтийн бүх л дээд удирдлага Жунатай уулзах гэж дугаарладаг байсан гэх яриа ч байдаг.

Яагаад тэд ийм мухар сүсэгтэй байдаг вэ? Энэ нь ерөөсөө л эрх мэдлийн тогтворгүй байдал болон айдастай холбоотой. Хэнд ч итгэж болохгүй, хэзээ ч буудуулах эсвэл хорлогдох аюултай орчинд амьдардаг дарангуйлагчид шинжлэх ухаанаас илүү тавилан, хувь заяа болон ид шидэнд итгэж эхэлдэг байна.

Сонирхолтой нь,  ЗХУ-д "10003 дугаар анги" гэх нууц хэлтэс КГБ-ын дэргэд байсан бөгөөд тэд "алсын зайнаас харах", "тархи угаах", "энергийн зэвсэг" зэрэг парапсихологийн судалгааг улсын төсвөөр хийдэг байжээ.

Хэдийгээр шашин шүтлэгийг албан ёсоор хориглож байсан ч социалист Монголын удирдагчид дотоод сэтгэлдээ "тэнгэр", "хувь тавилан"-аас айдаг байв.

Маршал Чойбалсан сүм хийдийг олноор нь нурааж, лам нарыг хэлмэгдүүлсэн ч Гандантэгчинлэн хийдийг "шашны музей" нэрээр авч үлдсэн нь түүнийг "нүгэл"-ээсээ айж, ямар нэгэн байдлаар шашны галыг таслахгүй байх гэсэн далд айдастай байсантай холбодог. Тэрээр цэргийн парад болон чухал шийдвэрийн өмнө цаг агаар харах, мэргэ төлөгт ач холбогдол өгдөг байсан тухай аман яриа бий.

Ю.Цэдэнбал өөрөө шинжлэх ухаанч хүн байсан ч түүний эхнэр Анастасия Филатoвa нь маш мухар сүсэгтэй нэгэн байжээ. Тэрээр Оросын зөн билэгчдийг сонирхож, Цэдэнбалын эрүүл мэнд, ажил үйлсийг даатгадаг байсан гэх яриа ч бий. Мөн Монголын зарим том лам нартай нууцаар уулзаж байсан тухай баримтууд байдаг.

1990 оноос хойш Монголын улстөрчид бөө, лам, зөн билэгчдийг албан ёсоор зөвлөхөө болгож эхэлсэн. Анхны ерөнхийлөгч П.Очирбат нь Дашцэрэн гэх хүнийг “Төрийн үзмэрч” гэх албан тушаалд тавьж байсан түүхтэй.

Н.Энхбаярын хувьд түүнийг Бурхны шашны гүнзгий мэдлэгтэй, судар орчуулдаг байсныг хүмүүс мэднэ. Гэвч түүнийг тойрсон "нууц" зөн билэгчид, ламын нөлөө маш их байсан гэгддэг. Тэрбээр төрийн ордонд Есөн хөлт цагаан тугийг залах, төрийн тахилгат уулсыг сэргээх зэрэг зан үйлийг эхлүүлсэн нь улс төрийг бэлгэдэл, далд хүчээр удирдах гэсэн оролдлого гэж шүүмжлэх хүмүүс ч байдаг.

Ерөнхийлөгч асан Х.Баттулгын үед бөө мөргөл, тэнгэр үзэл улс төрд маш хүчтэй орж ирсэн. Түүнийг бөө нарын зөвлөлийг сонсдог, чухал шийдвэр гаргахын өмнө "тэнгэрийн тамга" болон бусад зан үйлийг үйлддэг байсан тухай яриа улс төрийн хүрээнд их байдаг.

Монголын улстөрчдийн хувьд сүсэг бишрэл нь төрийн хар хайрцагны бодлогын нэг хэсэг мэт болсон. Тэд ард түмнийг удирдахын тулд "тэнгэрээс тамгатай" эсвэл "уул усны ивээлд байгаа" гэх дүр төрхийг бүрдүүлэхийг хичээдэг нь худлаа биш билээ.